Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xxx. Psalm.

1. Dancket God, dat hy hem, oft van doodelicke krancheyt, oft van sulcker aenuechtighe, daer hy anders niet dan den doot in en sach, verlost hebbe: ende is hier eenen schoonen lof der barmherticheyt Gods ende troostinge, dat God de syne, hoewel hyse een kleyne tijt castijdt, dannoch wederomme wt helpt: als hy seyt: Want synen thoorne, etc.

A.1

Eenen Psalm te singhen, vander ^* inwijdinghe des huys Dauids.

* 2.Sam. 5.a.9.

2

ICk prijse dy Heere, want du hebst my verhooch, ^a ende en laetst myne vyanden hen niet ouer my verheughen.

a Psalm. 25.a.2.

3

Heere mijn God, doe ick schreydde tot dy, maecktestu my ghesont.

4

^b Heere du hebst mijn ziele wt der Hellen geuoert, ^c du hebst my leuendich behouden, daer die in de Helle varen.

b 1.Sa. 2.a.6.

c Psalm. 86.b.13.

5

Ghy Heylighen, lof singhet den Heere, danct ende prijst ^d syne heylicheyt.

d Dat is, Prediket, dat God niet zy een God der valschen huychelers, als sy hen roemen, maer hy is heylich, ende heeft de rechte Heylighen lief. Psal. 18.c.28.

6

^e Want synen toorn duert eenen oogenblick, ende heeft ^f lust ten leuen: den auont lanck duert het weenen, doch des morghens de vreuchde.

e Esa. 54.a.7. 2.Corint. 4.b.17. Mich. 7.b.18.

f Het en is synen ernst niet: hy meynet goet, ende niet het steruen, alsoot hem voelen laet.

7

Ick doch sprac, doe het my wel ghinck: Ick en sal nemmermeer daer neder ligghen.

8

Want Heere door dijn welbehaghen, hebstu mynen berch sterck ghemaect, doch doe du dijn aensicht verberchdest, verschrock ick.

9

Ick wil Heere roepen tot dy, den Heere wil ick smeecken.

B.10

^g Wat is nut aen mynen bloede wanneer ick doot ben? sal dy oock het stof dancken? ende dyne trouwe verkondighen?

g Psalm. 6.a.6. ende 88.b.12. ende. 115.b.17. Iesa. 38.b.18.

11

Heere hoort, ende weest my genadich: Heere weest mijn helper.

12

Du hebst my mijn klaghe verandert in eenen reye: du hebst mynen sack wtghetoghen, ende my met vreuchden ghegordet.

13

Op dat dy lof singhe mijn ^h eere, ende niet stille en worde: Heere mijn God, ick wil dy dancken in eewicheyt.

h Mijn ghereetschap ende snarenspel, daer ick dy mede eere. Psalm. 16.a.9.