Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den xxi. Psalm.

1. Een Prophecie van Christo, ende synen Rijcke: Het en kan ymmers van Dauid niet verstaen worden, dewijle hy seyt: Hy sal leuen eewichlicken, ende zy ghesettet ten seghen, namelicken, dat hy andere seghene, als Gene. 13. staet: 13. hier wort oock toegesettet een Prophecie vanden afual ende onderganck der Synagoge.

A.1

Eenen Psalm Dauids voor te singhen.

2

HEere, de Koninck verheucht hem in dyner kracht: ende hoe gantsch vrolick is hy in dyner hulpe.

3

Du gheefst hem zijns herten wensch: ende en weygherst niet, wat synen mont bidt. Sela.

4

Want du ouerschuddest hem met goeden segen: ^a du settest een gulden kroone op zijn hooft.

a 2.Sam. 12.d.30

5

Hy biddet dy om het leuen, so gheefstu hem een lanck leuen altoos ende eewichlick.

6

Hy heeft groote eere aen dyner hulpe: du legghest lof ende cieragie op hem.

7

Want du settest hem ten seghen eewichlick: du verheughest hem met der vreuchden dijns aenghesichts.

8

Want de Koninck hoept op den Heere, ende sal door de goedicheyt des Hoochsten vast blijuen.

9

Dijn hant sal vinden alle dyne vyanden: dijn rechter hant sal vinden, die dy haten.

C.10

Du saltse maken als eenen vyerouen, wanneer du in de sake sien salt: de Heere salse verslinden in synen toorn, het vyer salse verteeren.

11

Hare vrucht saltu ombringhen vanden Aertbodem, ende hare zaet vanden menschen kinderen.

12

Want sy dachten dy quaet te doen, ende maecten aenslaghen, die sy niet en konden wtuoeren.

13

Want du saltse ter ^b schouderen maken: met dyner pese saltu teghen haer aengesicht oogen.

b Dat is, Dat sy altijts dragen ende ongheluck lijden moeten.

14

Heere ^c† verheft dy in dyner kracht, so willen wy singhen, ende louen dyne macht.

c† An. Heft dy op.