Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 180v]

Den xvij. Psalm.

1. Koemt ouer een met den inhoudt des xij. Psalms: want hy bidt teghen de valsche Propheten ende Ketters: ende begeert, dat hen God in heylsamer leere beware: gheeft daer beneuens te kennen, dat hy om des woorts wille, (gelijck als ooc heden ten daghe alle warachtige Christenen) zy gehaett, ende als een Ketter gescholden.

A.1

Een ghebet Dauids. HEere ^{a *} verhoort de gherechticheydt, merckt op mijn roepen, verneemt op mijn ghebet, dat niet wt valschen monde gaet.

a Psalm. 26.a.1.

* Ick wete, dat ick niet valsch, maer dijn woordt leere: daerom wiltu my niet verhooren, so verhoort dyne eygen rechte sake.

2

Spreeckt du in mijner saken, ende siet du op het recht.

3

^b Du proeuest mijn herte, ende besoecst het des nachts, ende reynigest my, ende en vindest niets, ick hebbe my voorgheset, dat mynen mont niet en sal ouertreden.

b Prouerb. 17.a.3. Psalm. 7.b.10.

4

Ick beware my in den woorde dyner lippen, voor menschen werck, op den weghe des moordenaers.

5

^c Onderhoudt mynen ganck op dyne voetpaden, dat myne treden niet en slibberen.

c of, ondersteundt

6

Ick roepe tot dy, dat du God my woudest verhooren: neycht dyne ooren tot my, hoort myne reden.

7

Bewijst dyne wonderlicke goedicheydt, du ^d Heylant dier die dy betrouwen, teghen die, die hen teghen dijn rechter hant setten.

d Of, Heylgeuer, Salichmaker

8

^e Behoedt my als eenen ooghenappel, in der ooghe: ^f beschermt my onder de schaduwe dyner vleughelen.

e Zachar. 2.a.8.

f Matth. 23.d.37. Psalm. 63.a.8. 4.Esdr. 1.d.30.

9

Voor den Godloosen, die my verstooren: voor mijne vyanden, die om ende om na myner zielen staen.

B.10

Hare ^g Vette houden te samen: sy spreken met haren monde stout.

g dat is, de Groote ende Geweldige

11

Waer wy gaen, so omringen sy ons: hare ooghen richten sy daer henen, dat sy ons ter Aerden storten.

12

Gelijck als eenen Leeuwe, die des roofs begeert, als eenen ionghen Leeuwe, die in de kuylen sitt.

13

Heere maeckt dy op, ouerweldicht hen, ende verootmoedicht hen, verlost mijn ziele van den Godloosen, ^h† met dynen sweerde.

h† And. dat dijn sweert is. Ephes. 6.b.17. Apoca. 19.b.15.

14

Van de lieden ⁱ dyner handt Heere, van den lieden deser werelt, ^k welcke haer deel hebben in haren leuen, dien du den buyck vullest met dynen schatte, die daer kinderen de volheyt hebben, ende laten haer ouerschot haren ionghen.

i Dat is, die dy in dijn handt komen te straffen. Hebr. 10.d.31. Psalm. 21.a.9.

k Sapient. 2.a.9.

15

Ick doch wil schouwen dijn aensicht in gerechticheyt: ick wil satt worden, wannneer ick ^l opwake na dynen beelde.

l opwaken, dat is, wacker in den woorde ende in het gelooue zijn, ende niet snorken noch traech zijn.