Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Den ix. Psalm.

1. Danct God ouer synen ouerwonnen vyanden, 10. prijst syne goedicheyt, gherechticheydt ende macht, daer hy de syne, wanneer het tijdt ende stonde is, mede verlost.

A.1

Eenen Psalm Dauids, van de schooner iueghet, voor te singhen.

2

ICk ^a dancke den Heere van gantscher herten, ende vertelle alle dyne wonderen.

a Psalm. 111.a.1. ende 138.a.1.

3

Ick verblijde my, ende ben vrolick in dy, ende loue dynen Name, du Allerhoochste:

4

D at du myne vyanden te rugghe ghedreuen hebst: sy zijn gheuallen ende omkomen voor dy.

5

Want du voerest mijn recht ende sake wt: du sittest op den Stoel een ^b recht Richter.

b Psalm. 7.b.12. Ierem. 11.c.20.

6

Du scheldest de Heydenen, ende brengest de Godloosen om: haren Name verdelghestu altoos ende eewichlick.

7

De ^c† sweerden des vyants hebben een eynde: ^d de steden hebstu omghekeert: haer ghedachtenisse is omkomen met hen.

c† And. verwoestinghe

d Gene. 19.c.24.

8

De Heere daerenteghen blijft eewichlick: hy heeft synen Stoel bereydet ten gherichte.

9

^e Hy sal den Aertbodem recht richten, ende de lieden regeren oprechtelick.

e Actuum 17.d.31

B.10

Ende de Heere is des armen beschuttinghe, ^f een beschuttinghe in der noot.

f Esaie. 33.a.2.

11

Daerom hopen op dy, die dynen Name kennen: ^g want du en verlaetst niet, die dy Heere soecken.

g Deut. 4.d.31.

12

Loeft den Heere, ^h die tot Zion woonet: verkondicht onder den lieden zijn doen.

h Psalm. 76.a.3. Esaie. 8.b.10.

13

Want hy denckt ende vraecht na haren bloede: hy en vergheet des schreyens der armen niet.

14

Heere weest my ghenadich: siet aen mijn ellende, onder den vyanden, du die my verheffest wt de poorten des doots.

15

Op dat ick vertelle alle dynen prijs, in de poorten der dochteren Zion: dat ick vrolick zy ouer dyner hulpe.

16

De Heydenen zijn versoncken ⁱ in der kuylen, die sy toegherichtet hadden: haren voet is gheuangen in het net, dat sy ghestelt hadden.

i Psalm. 7.b.16. ende 35.a.8. Prouer. 26.c.27. Syrach. 28.a.3. Eccles. 10.a.4. 1.Hesther. 7.b.10. Susan. g.62. Danie. 6.c.24.

17

So bekentmen dat de Heere recht doet: ^k de Godloose is verstrickt in den wercke syner handen, door ^l het woort. Sela.

k Prouer. 5.c.22. ende 26.a.6.

l Betrachtinghe des woorts, sonder ghewelt, sweert ende vleeschelicken arm. In silentio et spe, erit fortitudo vestra. and. Higaion. Sela.

18

Och dat de Godloosen moesten tot der Hellen ghekeert worden, ende alle Heydenen die Gods vergheten.

19

Want hy en sal des armen niet so gantsch vergheten, ende de hope der ellendighen, en sal niet verloren zijn eewichlick.

C.20

Heere staet op, dat de menschen de ouerhandt niet en krijghen: laet alle de Heydenen voor dy gherichtet worden.

21

Gheeft hen Heere eenen Meester: dat de Heydenen bekennen, dat sy menschen zijn. Sela