Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

[fol. 178v]

DE PSALTER Dauids.

Den Eersten Psalm.

1. Der Uromen (die hen met vermijden der boosen, tot Gods Wet begheuen,) ghelucksalickheyt, 4. desghelijcken der Godloosen onduchticheydt ende onderganck wert beschreuen.

A.1

VVel dien, die niet wandelt in ^a den raedt der Godloosen, noch treedt op den wech der sondaers, noch sitt daer de ^b bespotters sitten.

a Esai. 8.b.10. ende. 19.b.11. ende 30.a.1. Psalm. 33.b.10.

b Die het voor enckel dwaesheyt houden, wat God spreeckt ende doet.

2

^c Maer heeft lust tot de Wet des Heeren, ^d ende spreeckt van syner Wet, dach ende nacht.

c Prouerb. 2. 3.

d Iosu. 1.a.8. Psalm. 119.b.11. k.97.

3

^e Die is als een boom, gheplantet aen de waterbeken, die syne vrucht brenget te syner tijdt: ende syne bladeren verwelcken niet, ende wat hy maeckt, dat ^f gheluckt wel.

e Ierem. 17.a.8. Hesek. 47.b.12.

f Of, slaet

4

^g Doch so en zijn de Godloosen niet, maer als kaf, dat den windt verstroyt.

g Prouer. 10.b.16 Esaie. 29.a.5.

5

^h Daerom en blijuen de Godloosen niet int ⁱ gherichte, noch de sondaers inde vergaderinge der Rechtueerdighen.

h Esai. 26.b.10.

i Dat is, Sy en sullen noch ampt hebben, noch sus in der Christen versamelinge blijuen: ia sy verwaeyen henseluen, als het kaf van den koorne.

6

Want de Heere kent den wech der Rechtueerdighen: daerenteghen der Godloosen wech vergaet.