Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat vi. Capittel.

1. Darius vernieut het beuel Cores, ouer des Tempelsbouwinge ghegheuen, 12. den Tempel wert volbracht, 16. ende inghewijhet, 19. Paschen wert ghehouden.

A.1

DOe ^a beual de Koninc Darius, ⁺ datmen soecken soude in der Cantzelrije, in den schathuyse des Konincks, die te Babel lach.

a 3.Esdr. 6.c.23.

+ Darius.

2

Doe vandtmen ^b† te Ahmetha op der borcht, die in Meden leyt, een boeck, ende daer stondt een gheschiedenisse in also gheschreuen.

b† And. in eener laden

3

In den eersten Iare des Konincks Cores, beual de Koninck Cores, het huys Gods te Ierusalem te bouwen, op der stede daermen offert, ende den gront te legghen ter hoochte tsestigh ellen, ende ter wijdde oock tsestigh ellen.

4

Ende dry wanden van ^c† allerley steenen, ende eenen wandt van houte: ende den kost sal van den huyse des Konincks ghegheuen worden.

c† And. grooten of marmersteenen,

5

^d Daertoe de gulden ende silueren vaten des huys Gods, die NebucadNezar wt den Tempel te Ierusalem ghenomen, ende na Babel gebracht hadde, salmen weder gheuen, dat sy weder ghebracht worden in den Tempel te Ierusalem, aen haer stede in den huyse Gods.

d Esre 1.a.7. ende 5.b.14.

6

So maeckt v nu verre van hen, ⁺ du Thathnai Lantvoocht op gene zijde des waters, ende StharBosnai, ende haren Raedt van Arpharsach, die ghy op ghene zijde des waters zijt.

+ Darii beuel oft antwoordt van den Tempel ende Godsdienst weder op te richten.

7

Laetse arbeyden aen den huyse Gods, dat der Ioden Lantvoocht ende hare Oudtsten, het huys Gods bouwen aen zijn stede.

8

Oock is van mij beuolen, watmen den Oudtsten Iuda doen sal, te bouwen het huys Gods: namelicken, datmen van des Konincks goederen, van den renten op ghene zijde des waters, met vlijte neme, ende gheue het den lieden, ende datmen hen niet en weere.

9

^e Ende so sy behoefden kalueren, lammeren oft bocken, ten brandtoffer den God van den Hemel, tarwe, sout, wijn ende olye, na der wijse der Priesters te Ierusalem, salmen hen dagelicx geuen haer toebehoorte: ende dat sulcx niet versuymelick en gheschiede:

e 3.Esdr. 6.d.30.

B.10

Dat sy offeren ten sueten reucke den God van

[fol. 159r]

den Hemel, ^f ende bidden voor des Konincks leuen ende syner kinderen.

f 1.Timot. 2.a.2.

11

Van my is sulcken beuel gheschiet: ende welcker mensche dese woorden verandert, van dies huyse salmen eenen balck nemen, ende oprichten, ende hem daer aen hanghen: ende zijn huys sal ^g† den gherichte veruallen zijn, om dier daet wille.

g† An. mistschutte werden.

12

De God nu, die in den Hemel woonet, brenghe om alle Koningen ende volck, dat zijn hant wtrecket, te veranderen ende te breken dat huys Gods in Ierusalem: ick Darius hebbe het beuolen, dat het met vlijte ghedaen werde. ⁺

+ Den Tempel wert volbracht.

13

^h Dat deden met vlijte Thathnai de Landtvoocht op ghene zijde des waters, ende StharBosnai met haren Rade, tot welcker de Koninc Darius ghesonden hadde.

h 3.Esdr. 7.a.1.

14

ⁱ Ende de Oudtsten der Ioden bouweden: ende het ghinck voort, door de prophecie des Propheten Haggai ende Sacharia, des soons Iddo: ende bouweden ende richtedent op, na den beuele des Gods Israels, ende na den beuele Cores, Darij ende Arthahsastha, der Koningen in Persen.

i Esre. 5.a.2.

15

Ende volbrachten dat huys tot an den derden dach der maent Adar: dat was het seste Iaer des Konincks Darij. ⁺

+ Inwijhinghe des nieuwen Tempels.

16

^k Ende de kinderen Israels, de Priesters, de Leuiten ende de andere kinderen der geuanckenissen, hielden een inwijhinghe des huys Gods met vreuchden.

k 1.Para. 7.a.5.

17

Ende offerden in der inwijhinghe des huys Gods, hondert kalueren, twee hondert lammeren, vier hondert bocken, ende ten sondoffer voor het gantsche Israel, twaelf geyten bocken, na den ghetale der stammen Israels.

18

Ende stelde de Priesters ^l in hare ordeninge, ende de Leuiten in hare wacht, te dienen God die te Ierusalem is, als het gheschreuen staet int boeck Mose.

l Nume. 3.b.12. ende 8.b.16.

19

Ende de kinderen der gheuanckenisse hielden Passah, ⁺ in den veerthienden daghe der eerster maent.

+ Passah werdt ghehouden. Exodi 12.a.3. Nume. 9.a.2. ende 28.b.16. Leuit. 23.b.15. Deuter. 16.a.1. Hesek. 45.c.21.

C.20

Want de Priesters ende Leuiten hadden hen gereynicht, dat sy al te mael reyn waren, als een man: ende slachteden het Passah voor alle kinderen der geuanckenissen, ende voor hare broederen de Priesters, ende voor hen.

21

Ende de kinderen Israels, die wt der gheuanckenisse waren weder ghekomen, ende alle die hen tot hen wtgescheyden hadden, van der onreynicheydt der Heydenen in den lande, te soecken den Heere den God Israels, aten,

22

Ende hielden het Feest der ongeheuelder brooden, seuen dagen lanck met vreuchden: want de Heere haddese vrolick ghemaect, ende het herte des Konincx te Assur, tot hen ghewendet, dat hare handen ghesterct werden, in het werck aen den huyse Gods, die een God Israels is.