Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat ij. Capittel.

1. Salomo sendt aen Huram, om hout ende konstelicke arbeyders, ten ghebouwe des Tempels, 11. Huram danckt God, 13. ende neemt hem der bede gewillich aen, 17. de arbeyders Salomo werden ghetelt.

A.1

ENde Salomo dachte een huys te bouwen, ⁺ den Names des Heeren, ende een huys zijns Koninckrijcx.

+ Tempelbouwinghe Salomonis. 1.Regum 5.a.1.

2

Ende telde af tseuentich duysent mannen ter last, ende tachtentich duysendt timmerlieden op den berghe, ende dry duysendt ende ses hondert Amptlieden ouer haer.

3

Ende Salomo sandt tot Huram den Koninck te Tyro, ⁺ ende liet hem segghen: Ghelijck als du met mynen vader Dauid dedest, ^a ende hem Cederen sondest, dat hy hem een huys bouwede, daer hy in woonede [also doet oock met my.]

+ Huram. 1.Regum. 5.a.3.

a 2.Samu. 6.b.11.

4

Siet, ick wil den Naem des Heeren mijns Gods een huys bouwen, op dat hem gheheylicht worde, goet reuckwerck voor hem te roocken, ende Thoonbroot altoos te bereyden, ende brantoffer des morghens ende des auondts, op de Sabbathen, ende Nieuwemaenden, ende op de Feesten des Heeren onses Gods eewichlick voor Israel.

5

Ende het huys dat ick bouwen wil, sal groot zijn: want onse God is grooter dan alle Goden.

6

Doch wie vermach het, dat hy hem een huys bouwe? ^b want den Hemel ende aller Hemelen Hemel, en konnen hem niet ^c† versorghen: wie soude ick dan zijn, dat ick hem een huys bouwede? maer alleen ^d† datmen voor hem roocke.

b 3.Reg. 8.c.27. Esaie 66.a.1.

c† and. begrijpen Actuum. 17. God en is niet eener dienmen met menschen handen pleecht etc.

d† and. [sal dit gebouwe zijn] dat etcet.

7

So sendt my nu eenen wijsen man te arbeyden, met gout siluer, metael, ijseren, scharlaken, rozijnroot, ^e† geler zijden, ende die daer weet wt te grauen, met den wijsen die by my zijn in Iuda ende Ierusalem, die mijn vader Dauid gheschiet heeft.

e† an. blauwer

8

Ende sendt my Cederen, Dennen, ende ^f Hebenhout wt den Libanon: want ick weet het, dat dyne knechten het hout weten op den Libanon: ende siet, myne knechten sullen met dyne knechten zijn,

f Dit is een sonderlic hout in Iudia: ende is hier velichte het gene, datmen als nu Sandelen heet etc. an. Koral, Bresilyhout. Heb. Algumim.

9

Datmen my veel houts bereyde: want het huys dat ick bouwen wil, sal groot ende sonderlick zijn.

B.10

Ende siet, ick wil den timmerlieden dynen knechten, die dat hout houwen, twintich duysendt Cor ghestootender tarwen, ende twintich duysendt Cor gersten, ende twintich duysendt Bath wijns, ende twintich duysendt Bath olye gheuen.

11

Doe sprack Huram de Koninck te Tyro door schriften, ende sandtse Salomo: Daerom, dat de Heere zijn volck lief heeft, heeft hy dy ouer hen ten Koninck ghemaeckt.

12

Ende Huram sprack weder: Gheloeft zy de Heere de God Israels, die Hemel ende Aerde gemaect heeft, dat hy den Koninck Dauid heeft eenen wijsen, kloecken, ende verstandigen sone ghegheuen, die den Heere een huys bouwe, ende een huys zijns Koninckrijcks.

13

So sende ick nu eenen wijsen man, die verstant heeft, ^g† Huram Abif,

g† an, ende by mynen vader Huram gheweest is. and. Huram Abi. 1.Regum 7.b.13.

[fol. 145r]

14

Die een sone is eens wijfs van den dochteren Dan, ende zijn vader een Tyrier gheweest is: die weet te arbeyden aen het gout, siluer, metael, ijseren, steen, hout, scharlaken, gheler zijden, lijnen, rozijnroot, ende te grauen allerley, ende allerley konstelick te maken, watmen hem voorgheeft, met dynen wijsen, ende met den wijsen mijns heeren des Konincx Dauids dijns vaders.

15

So sende nu mijn heere, tarwe, gerst, olye ende wijn synen knechten, als hy ghesproken heeft:

16

So willen wy het hout houwen op den Libanon, so veel als dies van nooden is, ende willent op vloten brenghen op de Zee na Iapho: van daer machstu het op na Ierusalem brenghen.

17

Ende Salomo telde alle vreemdelinghen in den lande Israels, na den getale ⁱ als Dauid zijn vader telde, ende daer werden gheuonden, hondert ende vijftich duysent, dry duysent ende ses hondert.

i 2.Para.23.a.1.

18

Ende hy maecte van denseluen tseuentich duysendt draghers, ende tachtentich duysendt houwers op den berghe, ende dry duysendt ende ses hondert opsienders, die het volck ten dienste aenhielden.