Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xxviij. Capittel.

1. Een gemeyn vermaenreden Dauids aen zijn volck, 9. ende aen synen sone Salomo, 11. dien hy des Tempels ende zijns gantschen ghereets bewerp, met tsamen allen toebehoorte, 20. met ernstlicker verweckinghe ouergheeft.

A.1

ENde Dauid vergaderde te Ierusalem alle Ouersten Israels, namelicken, de Vorsten der stammen, de Vorsten der ordeninghen, die op den Koninck ^a wachteden, de Vorsten ouer duysent ende ouer hondert, de Vorsten ouer de goederen ende het vee, des Konincx ende syner sonen, met den kamerlinghen, de krijchslieden ende alle redelicke mannen.

a Of, wacht ende acht hielden

2

Ende Dauid de Koninck stondt op syne voeten, ende sprack: Hooret my toe, myne broeders ende mijn volck: ^b Ick hadde my voorghenomen een huys te bouwen, ⁺ daer de Arcke des Verbondts des Heeren in rusten soude, ende een voetschabel den voeten onses Gods, ende hadde my gheschickt te bouwen.

b 2.Samu. 7.a.1.

+ Wederom spreect Dauid van Salomo ende den Tempel.

3

Doch God liet my segghen: ^c Du en salt mynen Name gheen huys bouwen: want du bist een krijchsman, ende hebst bloet vergoten.

c 1.Regum 5.a.3. 1.Paral. 22.a.8.

4

^* Nu heeft my de Heere de God Israels, verkoren wt den gantschen huyse mijns vaders, dat ick een Koninck ouer Israel zijn soude eewichlic: ^d want hy heeft Iuda verkoren ten Vorstendom, ende inden huyse Iuda mijns vaders huys, ende onder den kinderen mijns vaders, heeft hy een welgheuallen ghehadt aen my, dat hy my ouer het gantsche Israel ten Koninck makede.

* 1.Sam. 16.a.1.

d Gene. 49.a.8. 1.Para. 5.a.2.

5

Ende onder alle myne sonen (want de Heere heeft my vele sonen ghegheuen,) heeft hy mynen sone Salomo verkoren, ⁺ dat hy sitten sal, op den Stoel des Koninckrijcks des Heeren ouer Israel.

+ Salomo. 1.Para. 21.a.9. Sapient. 9.a.6.

6

Ende heeft my gheseyt: ^e Dijn sone Salomo, sal mijn huys ende hof bouwen: want ick hebbe hem my wtuerkoren ten sone, ende ick wil zijn vader zijn,

e 1.Para. 17.b.12. 2.Para. 6.a.9.

7

^f Ende wil zijn Koninckrijck ^g beuestighen eewichlick, so hy sal neersticheydt aenwenden, dat hy doe na mynen geboden ende rechten, als het heden staet. ⁺

f 1.Reg. 8.c.15.

g Of, stadtgrijpich, of, vast maken,

+ Bescheyt der toesegginghe.

8

Nu voor den gantschen Israel der Gemeynten des Heeren, ende voor den ooren onses Gods: ^h so houdet ende soecket, alle gheboden des Heeren ws Gods: op dat ghy besittet het goede lant, ende eruent op uwe kinderen na v eewichlick.

h 1.Regum 2.a.3.

9

Ende du mijn sone Salomo, bekent den God dijns vaders, ende dient hem met gantscher herten, ende met eener williger ziele: ⁱ want de Heere ^k ondersoeckt alle herten, ende verstaet alle ghedachten dichten: saltu hem soecken, so saltu hem vinden: saltu hem daerenteghen verlaten, so sal hy dy verwerpen eewichlick.

i Psalm. 7.b.10.

k of, doorgrondet

B.10

So siet nu toe: want de Heere heeft dy verkoren, dat du een huys bouwest ten Heylichdom: hebt eenen goeden moet ende bereyde het.

11

Ende Dauid gaf synen sone Salomo, een voorbeelt ^l† des voorhuys, ende zijns huys, ende der ^m gemacken, ende salen, ende kameren daer binnen in, ende des huys des Ghenadenstoels.

l† And. der hale, Salomo bouwet wt Gods beuel, na den woorde Gods, synen vader toegheseyt: Hier bouen 17.b.11. Oock geeft hem Dauid het monster daer toe: want selfs verkoren Godsdienst ende wercken, en wil God niet hebben.

m Of, ghemackkameren,

12

Daertoe voorbeelden alle dies, dat hy in synen ghemoet hadde, namelicken des hofs aen den huyse des Heeren, ende aller ghemacken rontom, des schats in den huyse Gods, ende des schats der Gheheylichden.

13

De ordeninghe der Priesters ende Leuiten, ende alle der wercken der Ampten in den huyse des Heeren.

14

Gout na den gout ghewichte, tot allerley vaten eens yeghelicken Ampts, ende allerley silueren ghereetschap na den ghewichte, tot allerley vaten eens yeghelicken Ampts.

15

Ende gout tot gulden kandelaren, ende gulden lampen, eenen yeghelicken kandelaer ende syner lampen, zijn ghewicht: also oock tot silueren kandelaren, gaf hy het siluer ten kandelaer ende syner lampen, na den Ampte eens yeghelicken kandelaers.

16

Oock gaf hy gout tot disschen der Thoonbrooden, tot eenen yeghelicken dissche zijn ghewicht: also oock siluer tot silueren disschen.

17

Ende louter gout tot krauwelen, beckens ende kannen: ende tot gulden bekeren, eenen yeghelicken beker zijn ghewicht: ende tot silueren bekeren, eenen yeghelicken beker zijn ghewicht.

18

Ende ten Reuckaltaer zijn ghewicht, het aller louterste gout: oock een voorbeeldt des waghens der guldenen Cherubim, dat sy hen wtbreydeden, ende bedeckeden bouen de Arcke des Verbonts des Heeren.

19

Het is my al te mael beschreuen ghegheuen van der hant des Heeren, dat het my onderwese alle wercken des voorbeelts.

C.20

Ende Dauid sprack tot synen sone Salomo: Weest vrijmoedich, ende hebt eenen goeden moet, ende bereyde het: vreest dy niet, ende en vertzaecht niet: God de Heere, mijn God, sal met dy zijn, ende en sal de hant niet aftrecken, noch dy verlaten, tot dat du alle wercken ten Ampte in den huyse des Heere volbrenghest.

21

Siet daer, de ordeninghe der Priesters ende Leuiten tot allen Ampten inden huyse Gods, zijn met dy tot allen wercken, ende zijn willich ende

[fol. 144r]

wijs tot allen Ampten: daertoe de Vorsten ende alle het volck tot allen dynen handelen.