Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat x. Capittel.

1. Saul met tsamen syne dry sonen wort verslagen, 11. ende van die te Iabes in Gilead begrauen.

A.1

DE Philisteen ^a streden tegen Israel: ⁺ ende die van Israel vloden voor de Philisteen, ende de verslagene vielen op den berch Gilboa.

a 1.Sam. 31.a.1.

+ Saul ende syner sonen doot.

2

Nu de Philisteen hinghen hen aen Saul ende syne sonen, ende iaechden achter hen henen, ende sloegen Ionathan, AbiNadab, ende Malchisua de sonen Sauls.

[fol. 138r]

3

Ende den strijdt wert hardt teghen Saul, ende de boghenschutters quamen aen hem, dat hy van de schutters ghewont wert.

4

Doe sprach Saul tot synen wapendragher: ^b Trect dijn sweert wt, ende doorsteeckt my daer mede: op dat dese onbesnedene niet en komen, ende schandelicken met my omgaen: doch zijn wapendragher en woude niet, want hij vreesde seer: doe nam Saul zijn sweert, ende viel daer in.

b Iudic. 9.f.54.

5

Doe nu zijn wapendrager sach, dat Saul doot was, viel hy oock int sweert, ende sterf.

6

Also sterf Saul, ende zijn dry sonen, ^c ende zijn gantsche huys te ghelijck.

c 1.Paral. 8.d.34. ende 9.d.39.

7

Doe nu de mannen Israels die in de leechte waren, saghen dat sy geuloden waren, ende dat Saul ende zijn sonen doot waren, verlieten sy hare steden, ende vloden: ende de Philisteen quamen ende woonden daer inne.

8

^d Des anderen morghens quamen de Philisteen, de verslaghene wt te trecken, ende vonden Saul ende syne sonen ligghen, op den berch Gilboa.

d 1.Sam. 31.a.8.

9

Ende toghen hem wt, ende namen zijn hooft ende syne wapen op, ende sondent int lant der Philisteen rondtom, ende lietent verkondighen voor haren Afgoden, ende den volcke.

B.10

Ende leyden syne wapen int huys haers Gods, ende zijn hooft hechteden sy aen het huys Dagon.

11

^e Doe nu alle die te Iabes in Gilead hoorden, alles wat de Philisteen Saul ghedaen hadden,

e 1.Sam. 31.b.11. 2.Sam. 2.a.4.

12

Maecten sy hen op alle strijdtbare mannen, ende namen het lichaem Sauls ende syner sonen, ende brachtense te Iabes, ende begroeuen hare ghebeenten onder de Eycke te Iabes, ende vasteden seuen daghen.

13

Also sterf Saul in syner misdaet, die hy teghen den Heere ghedaen hadde, ^f aenden woorde des Heeren, dat hy niet en hieldt: ^g oock dat hy de Waersegster vraechde,

f 1.Sam. 15.a.3.c.23.

g 1.Sam.28.a.8.

14

Ende en vraechde den Heere niet: daerom doodde hy hem, ende keerde het Koninckrijck tot Dauid den sone Isai.