Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat v. Capittel.

1. Hiram sendt syne boden tot Salomo, 6. verwillighet hem, na zijn begeerte, hout ende knechten ten bouwe des Tempels, 12. ende maecte een verbont met hem, 13. van den ghetale der arbeyders Salomo.

A.1

ENde Hiram de Koninc te Tyro sandt syne knechten tot Salomo: ⁺ want hy hadde ghehoort, dat sy hem ten Koninck ghesalft hadden in zijns vaders stede: ^a want Hiram hadde Dauid lief zijn leefdaghe.

+ Hiram schickt syne boden tot Salomo.

a 2.Sam. 5.b.11.

2

^b Ende Salomo sandt tot Hiram, ende liet hem segghen:

b 2.Para. 2.3.

3

^* Du weetst dat mijn vader Dauid niet konde bouwen een huys den Name des Heeren zijns Gods, om des krijchs wille, die rontom hem was, tot datse de Heere onder syne voetsolen gaf:

* 1.Para. 22.a.8. ende 28.a.3.

4

Nu daerentegen heeft my de Heere mijn God ruste ghegheuen rontom, dat daer gheen wederpartijder noch quade hindernisse meer is.

5

Siet, so hebbe ick ghedacht een huys te bouwen, den Name des Heeren mijns Gods, ^c als de Heere ghesproken heeft tot mynen vader Dauid, ende geseyt: Dijn sone, dien ick in dijn stede setten sal op dynen Stoel, die sal mynen Name een huys bouwen.

c 2.Sam. 7.b.13. 1.Para. 22.b.10.

6

So beueelt nu, ⁺ datmen my Cederen wt Libanon houwe, ende dat dyne knechten met mynen knechten zijn: Ende het loon dyner knechten wil ick dy geuen, alles als du segst: want du weetst, dat by ons niemandt en is, die hout te houwen weet, ghelijck als de Zidoniers.

+ Salomo begheert hout van Hiram ten Tempel.

7

Doe Hiram nu hoorde de woorden Salomo, verblijdde hy hem hooch, ende sprack: Gheloeft zy de Heere heden, die Dauid eenen wijsen sone ghegheuen heeft, ouer dit groot volck.

8

Ende Hiram sandt tot Salomo, ende liet hem segghen: Ick hebbe ghehoort, wat du tot my gesonden hebst: Ick wil doen na alle dijn begheerte, met Cederen ende Dennen houte.

9

Myne knechten sullense van Libanon af brenghen aen de Zee, ende wilse in vloten legghen laten op de Zee, tot aen de plaetsen, die du my salt aenseggen laten: ende wilse behouwen laten aldaer, ende du salt het halen laten: Doch du salt oock mijn begheerte doen, ende spijse gheuen mynen gesinne.

B.10

Also gaf Hiram Salomo Cederen ende Dennen hout, na allen zijn begheerte.

11

Salomo daerenteghen gaf Hiram twintich duysendt Coor tarwen, te eten voor zijn ghesin, ende twintich Coor ghestooten olye: Sulcx gaf Salomo Iaerlicx den Hiram.

12

Ende de Heere gaf Salomo wijsheyt, als hy hem ghesproken hadde: ⁺ Ende daer was vrede tusschen Hiram ende Salomo, ende sy maeckten beyde een verbont te samen.

+ Een verbondt tusschen Salomo ende Hiram.

[fol. 114v]

13

Ende Salomo ^d† verkoos een summe volcks wt den gantschen Israel: Ende de summe was dertich duysent mannen.

d† and. maecte een wtschot.

14

Ende sandtse in den Libanon, ^e† telcken op een maent thien duysendt, dat sy een maent lanck in den Libanon waren, ende twee maenden te huys: ^f Ende Adoniram was ouer sulcken summe.

e† an. ia op een etc.

f 1.Regum 4.a.6. ende 12.b.18.

15

Ende Salomo hadde tseuentich duysendt, die daer last droeghen, ende tachtentich duysent die daer timmerden op den berghe:

16

Behaluen de Ouerste amptlieden Salomo, die ouer het volck gheset waren, namelick, dry duysendt ende dry hondert, die ouer het volck heerscheden, dat daer aen den wercke arbeydde.

17

Ende de Koninck gheboot, dat sy groote ende kostelicke steenen wtbraken, namelick, ghehouwen steenen, ten fundamente des huys.

18

Ende de bouwlieden Salomo, ende de bouwlieden Hiram, ende de Giblien, hieuwen wt ende bereydden toe, hout ende steenen, het huys te bouwen.