Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat xx. Capittel.

1. Wtdeylinghe der vrijsteden, ende van haren ghebruycken.

A.1

ENde de Heere sprack met Iosua, ende seyde:

2

Segt den kinderen Israels: ⁺ Gheeft sommighe vrijesteden onder v, ^a daer ick v door Mose van gheseyt hebbe:

+ Ses vrijesteden.

a Exodi 21.b.13. Nume. 35.b.10. Deuter. 19.a.1.

3

Daer een dootslagher die een ziele onuersiens ende onwetende slaet, henen vlieden mach, dat sy onder v vrij zijn voor den bloetwreker.

4

Ende die tot dier steden een vlucht, die sal staen buyten voor der stadt poorte, ende voor den

[fol. 79r]

Oudtsten der stadt syne saken vertellen: so sullen sy hem tot hen in de stadt nemen, ende hem ruymte gheuen, dat hy by hen woone.

5

Ende wanneer hem de bloetwreker naiaecht, so sullen sy den dootslagher in syne handen niet ouergeuen, dewijle dat hy onuersiens synen naesten gheslaghen heeft, ende is hem te voren niet vyant gheweest.

6

So sal hy in der stadt woonen, tot dat hy sta voor der Ghemeynten voort gherichte: tot dat de hooghe Priester sterft, die tot der seluer tijdt zijn sal: als dan sal de dootslagher weder komen in zijn stadt, ende in zijn huys, in der stadt, daer hy van gheuloden is.

7

Doe heylichden sy Kedes in Galilea, op het gheberchte Naphthali, ende Sechem, op het geberchte Ephraim, ende KiriathArba, dat is, Hebron, op het gheberchte Iuda.

8

Ende op ghene zijde der Iordanen, daer Ieriho leyt, teghen den opganck der Sonnen, ^b gauen sy Bezer in der woestyne, op dat effen velt, wt den stamme Ruben, ende Ramoth in Gilead, wt den stamme Gad, ende Golan in Basan, wt den stamme Manasse.

b Deute. 4.e.43.

9

Dat waren de steden, die allen kinderen Israels, ende den vreemdelinghen, die onder hen woonden, ^c bestemt waren, dat daer henen vluchten soude, wie een ziele onuersiens slaet, dat hy niet en sterue door den bloedtwreker tot dat hy voor de Ghemeynte ghestaen heeft.

c Of, bescheyden