Biblia dat is, de gantsche Heylighe Schrift, grondelick ende trouvvelick verduydtschet, Met verklaringhe duysterer woorden, redenen ende spreucken [etc.] (Deux-Aes bijbel)

Dat viij. Capittel.

1. Uan der saluinghe ende wyinghe Aarons, ende syner sonen, 10. oock de wooninghe.

A.1

ENde de Heere sprack met Mose, ⁺ ende eyde:

+ Der Iodischen Priesters wyinghe.

2

Neemt Aaron ende syne sonen met hem, ^a met tsamen haren kleederen, ende de salfolye, ^b ende eenen ^c† osse ten sondoffer, twee rammen ende eenen korf met ongheheuelde broode.

a Exodi 28.a.2

b Exodi 29.a.1

c† Anders, varre

3

Ende vergadert de gantsche menichte voor de deure der hutten des ^d† Bescheyts.

d† Anders, Tuygenisse of Stifts.

4

Mose dede als hem de Heere geboot, ende vergaderde de menichte voor de deure der hutten des Bescheyts,

5

Ende sprack tot haer: ⁺ Dat isset dat de Heere gheboden heeft te doen.

+ Aarons ende zijnder sonen wyinghe.

6

Ende nam Aaron ende syne sonen, ende wieschse met water.

7

Ende trock den ^e† lijnen rock aen, ende gordde hem met den gordel, ende trock hem ^f† den ghelen zijden rock aen, ende trock hem den lijfrock aen, ende gordde hem ^g† ouer den lijfrock.

e† Anders, enghen

f† Anders, het wijt hembde aen

g† And. het konstelicke werc des lijfrocks.

8

Ende dede hem den borstlap aen, ende in den borstlap ^h† Licht ende Recht.

h† Anders, Urim ende Thumim.

9

Ende settede hem den hoet op zijn hooft, ende settede aen den hoet bouen aen zijn voorhooft het gulden

[fol. 36r]

bladt aen de heylige kroone, als de Heere Mose gheboden hadde.

B.10

ⁱ Ende Mose nam de salfolye, ende salfde de wooninghe, ende alles wat daerin was, ende wijhede het:

i Exodi 30.c.26

11

Ende sprengde daermede seuenmael op den Altaer, ende salfde den Altaer, met allen synen ghereetschap, het hantuat met synen voete, dat het ghewijt wert.

12

^k Ende goot de salfolye op Aarons hooft, ende salfde hem, dat hy ghewijt wert.

k Syrach 45.b.18 Psalm. 133.a.2

13

Ende brachte hiertoe Aarons sonen, ende trock hen lijnen rocken aen, ende gordese met den gordel, ende bandt hen huyuen op, als hem de Heere beuolen hadde.

14

Ende liet hiertoe brenghen eenen osse ten sondtoffer, ende Aaron met synen sonen leyden hare handen op zijn hooft:

15

Doe slachtede men hem, ende Mose nam vanden bloede, ende ^* doppede daermede op de hoornen des Altaers rontom met synen vinger, ende ontsondichde den Altaer: ende goot het bloedt aen des Altaers bodem, ende wijde hem, dat hy hem versoende.

* Of, streeck

16

Ende nam alle het vet aen het inghewandt, het nette om de leuer, ende de twee nieren met den vette daeruan, ende stack het aen op den Altaer.

17

Nu den Osse met synen velle, vleesche, ende drecke, verbrandde hy met vyer buyten den legher, ^l als hem de Heere gheboden hadde.

l Exo. 29.a.1.b.10

18

Ende bracht hiertoe eenen Ram ten brandtoffer, ende Aaron met synen sonen leyden hare handen op zijn hooft.

19

Doe slachtede men hem, ende Mose sprengde vanden bloede op den Altaer rontom,

C.20

Hieu den Ram in stucken, ende stack aen het hooft, de stucken, ende den romp.

21

Ende wiesch het inghewant, ende de beenen met water, ende stack also den gantschen Ram aen op den Altaer: Dat is een brantoffer ten seuten reucke, een vyer den Heere, als hemde Heere gheboden hadde.

22

^m Hy brachte oock hiertoe den anderen Ram des ^n† vullen offers, ende Aaron met synen sonen leyden hare handen op zijn hooft.

m Exodi 29.b.19

n† Anders, offers der inwyinge.

23

Doe slachtede men hem, ende Mose nam van synen bloede, ende ^o doppede Aaron daermede op het lapken van zijn rechter oor, ende op den duym zijnder rechter hant, ende op den grooten teen zijns rechten voets.

o Of, streeck

24

Ende brachte hiertoe Aarons sonen, ende doppede met den bloede op het lapken van harer rechter oore, ende op den duym harer rechter handt, ende op den grooten teen haers rechter voedts, ende sprengde het bloet op den Altaer rontom.

25

^p Ende nam het vet ende den steert, ende alle het vet aen het inghewandt, ende het net om de leuer, de twee nieren met den vette daeruan, ende de rechter schouder.

p Exodi 29.c.22

26

Daertoe nam hy wt den korue des ongheheuelden broodts voor den Heere, eenen ongeheuelden koeck, ende eenen koeck gheolijts broots, ende een vlade, ende leyde het op het vette, ende op de rechter schouder.

27

Ende gaf dat alle te samen in de handen Aarons ende syner sonen, ende beweechde het ter beweginghe voor den Heere.

28

Ende nam het alle weder van haren handen, ende stack het aen op den Altaer, bouen op den brandtoffer: want het is een vullenoffer ten seuten reucke, een vyer den Heere.

29

^q Ende Mose nam de borst, ende beweechde een beweghinge voor den Heere, vanden Ramme des vullenoffers, die wert Mose tot synen deele, als hem de Heere gheboden hadde.

q Exodi 29.c.26

D.30

Ende Mose nam der salfolye, ende des bloedts op den Altaer, ende sprengde op Aaron ende syne kleederen, op syne sonen ende op hare kleederen, ende wijhede also Aaron ende syne kleederen, syne sonen ende hare kleederen met hem,

31

Ende sprack tot Aaron ende syne sonen: Koket het vleesch voor de deure der hutten des Bescheyts, ende etet aldaer: Daertoe oock ^r het broot in den korue des vullenoffers, als my geboden is, ende gheseyt, dat het Aaron ende syne sonen sullen eten.

r Exodi 29.d.32 Leuit. 24.a.9 Matthei 12.a.4

32

Wat daer nu ouerblijft van vleesche ende broode, dat sult ghy met vyer verbranden.

33

Ende sult in seuen daghen niet wtgaen, van der deure der hutten des ^s Bescheyts tot aen den dach, wanneer de daghen ws vullenoffers wt zijn: want in seuen daghen zijn uwe handen geuult,

s Of, Stifts,

34

Als het aen desen daghe gheschiet is: ^t† De Heere heeft het gheboden te doen, op dat ghy versoent zijt.

t† Anders, is, also heeft het de Heere gheboden etcet.

35

Ende sult voor der hutte des Bescheydts dach ende nacht blijuen seuen daghen lanck, ende sult op de wacht des Heeren wachten, dat ghy niet en sterft: want also isset my gheboden.

36

Ende Aaron met syne sonen deden alles wat de Heere gheboden hadde door Mose.