Dagboek van Gent van 1447 tot 1470. Deel 2

[p. 180]

Zint den zelven paeyse ende scependomme, begonst anno LIII, zyn gheschiet vele zaken die hier naer volghen, ende meer andre.

Te wetene, in 't zelve scependom, anno LIII, oochden, by octroye van den prince, groote assysen up ghestelt binnen Ghendt, up alle manieren van goede ende coopmanschepen, omme de betalynghe van III^c ende L^m cronen oft ryders, te XLVIII grooten 't stuck, ende andere lasten toegheseyt den⁺ voorscreven mynen gheduchten Heere, ende behelst in den voorscreven paeys van Gavere.

Item, de prevylegien van deser stede worden gheconfirmeert by mynen geduchten Heere, naer t'inhauden van zekeren lettren diere af zyn⁽¹⁾.

Item, de stede vercochte in dit jaer zekere groote renten ervelic ende ten lyve, omme den grooten commere daer zy in was, by octroye van den prinche.

Item, in 't zelve jaer waeren vercreghen by octroye van den prinche ende begonsten de twee vrie jaermaercten te Ghendt, d'eene t'alfvastenen ende d'andere te alfougste, gheduerende XIIII daghen lanc, 't coopen ende vercoopen van elcker maerct XIIII daghen ende XIIII naer 't commen ende wechtrecken⁽²⁾.

+ f^o 193 r^o

(1) Akte van 13^en October uit Rijsel, uitg. door Gachard, Documents Inedits, D. II, blz. 142, n^r 16; en zie ook de stukken uitgegeven in de Annalen van den Geschied- en Oudheidkundigen Kring van Gent (1900), D. IV, blz. 113.

(2) Akte van 13^en October 1453 op het Stadsarchief te Gent, n^r 615 van het Inventaire van Van Duyse, blz. 217.