Chiromantie

Dits tcapitel vander suchter linie vanden driehoecke of vander middelster linie

¶ De linie die men heet de suchtere vanden driehoecke daer af es nu te sprekene. Alse dese linie es rechte sonder berch van goeder breetheit diep gnouch van goeder varwen. dit betekent goede dispositie van complexien. ende ghesontheit engien ende ghetrouwecheit. ¶ Ende alsi wel gearticuleert es ende diepe ende wel blickende streckende tote den slaghe vander hant dit .be. lancheit des levens. Maer alsi lijdt alde hant. dit .be. cortheit van levene. dat een mensche cume leven sal een jaer. ofte alse ene linie hare den wech voregaet in dende. So .b. de vors. dingen. ¶ Eist dat si crom es ende herde rooet. dit bediet gramscap ende quade moveringhe alse omme enen dooeslach te

[p. 193]

doene of die nu gedaen es. Eist oec dat si subtijl es ende van goeder varwen dit .b. bliscap. Maer eist dat si bleec es van naturen. So bediedet crancheit van complexien. ¶ Ende alsi cort es ende niet achtervolghende. dit bediedt wandelheit ende lichtheit met ongestadecheiden van worden ¶ Ende alsi puttekine heeft in die middelt ende danne vele in beiden handen ende niet ghelijc. niet also dene als dander es van varwen. dese mensche en es negheen bequame persoen. ende hi ne es neghene ere sculdech te hebbene ¶ Eist oec dat dese linie crom es ende niet achtervolghende ende van diverser varwen ende cleine op dat si hare selven sceedt inde middelt. dit bediedt diefte ende rouwe ¶ Eist dat vele linien gaen van deser vorseider linie ter tafellinie wert die wel blickende siin ende van goeder varwen. dit bediedt duegcht ghetrouwecheit ende goede conscientie. ende tselve bediedt een cruse vonden tusschen deser linien ende der tafellinie. ende dat aldermeest in dien dat tcruse recht es. ende also vele te crommere. datse es also vele min .be. de vorseide dingen ¶ Ende eist dat van deser linie ene linie uut gaet ten cleinen vingere wert of ten vingere wert diere naest steet streckende ter tafellinie wert. dit .b. duecht ende dat een mensche wel gheredent es ende scaemt hem sonde te doene ¶ Ende eist dat een heeft een driehoexkiin buten der hant. of biden ende vander hant. dit .b. begerte van cunsten ende appetijt ende studie ende heere ¶ Eist oec dat dese linie diep es ende si dan linien heeft gecoppelt ten hollewert vander hant. dit .b. ongestadecheit en logene in een wiif. ¶ Eist dat si alte groet ende alte bleec es. ende niet achtervolgende ende ruggende dit bediedt crancheit van lichamen of ziecheit van hoefde. ¶ Ende eist dat dese vorseide linie lichtelec rooet wert van wrivene. dit bediedt crancheit van herssenen. Eist datmen vint puttekine inde vors. linie. dit bediedt ziecheit van oghen. ¶ Eist oec dat dese linie es in een stat roeder dan in die andere. dit .be. crancheit ende ziecheit van hoefde ¶ Ende eist dat dese linie ghevarwet es met diverser varwen dit .b. siecheiden. Ende dat si groete swarte putten heeft. dit .b. plompheit van sinne ¶ Eist oec dat dese linie bleec es ende daer in staen roede poente. dese heeft goet engien wel

[p. 194]

tontfane ende te verstane eist dat hi hem brect in studerne ¶ Eist datmen een cruce vint tusschen deser vors. linie ende der tafellinie onder den vinger die naest den cleinen vinger steet. dit bediedt dat een mensche ziec es om minnen willen ende om ere ende omme devocie ende omme nutscape te sinen behoef of teens anders behoef. ende dit es geseit vander suchtere vanden driehoecke of van der middelster linie also na als men mach.