Dit sijn de coren van der stad Antwerpen

Van der maten van Corne.

CXIX. Item, alrehande coren sal men meten bi der strijcmate, op die peine van iii s. Ende wie dat mate met onrechter maten, verboerde x s., ende men sal die mate ontwee sclaen; wie oec gherechte mate niet vol en gave, verboerde x s.

CXX. Item, niement en sal meten hert coren dat men ute den scepe op 't land draght, ochte van den lande in scepe, ochte van den lande op solders, ochte van den solre weder op 't land, dan metter maten van iii muddekene, die van der stat weghen daer toe gheordeneirt es, op die peyne van v s.

[p. 36]

Ende wat zacdraghere oec meer droeghe van diere maten ii die 't samen houden vi muddekene. Ende die meters selen hebben van elken hondert corens te metene v oude enghelsche, ochte de werde daer af.

CXXI. Item, negheen metere en mach coman zijn van corne, noch oec meten zijns gasts coren of dat hi te verwaerne heeft, op die peine van v lib. alzo dicke alse hijt dade. Ende elc metre sal segghen, als men 's hem vraght, wat hi sculdich es te hebbene, op die peine van v s.

CXXII. Item, sal elc copere moghen nemen enen metre dien hi wille, ende desghelike die vercopere enen dien hi wille, ende die zelen te samen meten ende ghelijc striken. Ende een metre die weygherde aldus eenen andren te metene, verborde xx s. alzo dicwile alse hijt dade.

CXXIII. Item, gheene zamencopers van corne en moghen coren copen en si dat die copere tieghenwordich zi, ende dat op die peine van enen voeder wijns. Ende zi en moghen gheen coren tappen, noch ghesellen zijn aen coren, dat men vercopen sal ten tappe, op die selve peine. Ende zi zelen nemen van enen hondert corens van zamencope, ghelijc dat haer brief houd, dat 's te wetene. Ende dat zelen si enenyegheliken berechten dies hem vraght, op die peine van xx s.

CXXIIII. Item, zamencopere van corne en mach niet houden te gaste den copere noch den vercopere van corne, op die peine van enen voeder wijns.

CXXV. Item, wie dat borghe wort die saelt ghelden met ghereeden penninghen ocht met panden. Ende teert hi daer

[p. 37]

op, so verboert hi x lib. ende die weert in wies huys dat hi teert verboert x lib.

CXXVI. Item, so en sal nyement binnen Antwerpen eneghe vorveynstre breeder moghen maken noch houden ter straten waert dan ii ½ voet; ende die vorlove breeder dan iii voet van den poybome recht uutwaert, op de peine van xx s. Ende men sal buten den voirveinstren gheen dinc setten, noch legghen moghen ter straten waert, optonnen, op scraghen, noch op gheen ander stellinghe, op die selve peine.

CXXVII. Item, wie dat niet en holpe eenen poertere jeghen die van buten, ende die niet en loept toter roepinghen des porters in node, verbort xx s. Doet hi oec yet in der hulpen des porters dat min dan goed ware, daer af sal hi quite sijn.

CXXVIII. Item, dat niement blasen noch teekenen en sal met hornen na der zonnen, op die peine van xx s.

CXXIX. Item, dat niement bal en slae op der straten, erghens binnen der uterster vesten, noch op eenich kerchof binnen der vriheit van der stat, op die peine van x s.

CXXX. Item, elc tavernier sal sine taverne sluten alzo saen als die diefclocke volluud es, dies niet en dade verborde xx s.

CXXXI. Item, wie dat yemene beclaeght omme scoud, ende deghene die beclaght word ende gheenen zeker zetten mach, blijft hi gherasteert ochte ghehouden vor die c1aghe, ende dieghene, die den anderen beclaght heeft, achter blijft, sal denghenen geven redeleken cost, alzo den scepenen moghelec sal dunken, ende sijn yserghelt quiten.

CXXXII. Item, wie oec yeman beclaght, ende dat ghedinghe so langhe ghevorst worde dat dieghene die beclaght worden daer af cost hebhen, ende die ghene diene beclaght heeft

[p. 38]

achter blijft, dieghene diene beclaght heeft sal den andren ghelden redenleken cost, ten goeddunkene van scepenen.

CXXXIII. Item, die speelt mach verliesen alleene sijn gheld, sine cledere, ende andere pande die hi over hem heeft. Ende ware oec dat zake dat deghene die jeghen hem speelde wonne met terlinghen, ochte med andren spele, bedden, cleederen, ocht andre pande, die hi uute sinen huyse brenghen dade, die soude hi hem wedergeven. Ende en wille hijs niet doen te vergheves, so sal ne 't gherechte daertoe dwinghen, op die peine van xx s. Ende so wie wetende in sijn huys, ochte in sinen kelnare, spelen laet, verbort die selven core. Ende so wat yement eenen andren leende of borghde om de redene van dobbelspele, te wat steden dat ware, ende in wat onlijchsene het si, des en sal men niet ghelden, op die selve peine. So wie met dobbelne of speelne meer wonne op enen andren dan hi daer over hem hadde, of meer leende omme te verspeelne, dat deghene die meer wonne oft leende verboren soude den vorseiden core. Ende nochtan en soude men hem niet ghelden dat hi meer wonne oft leende, ghelijc vore bescreven es.

CXXXIIII. [Item, so wie dat dobbelde omtrent oft op de trappen van den putte op die marct, ochte die eneghe dinc in den putte worpe, verboert v s. swerte. Ende heeft hi se niet te ghevene so sal men setten in 't pellorijn.]