Commentaar op het Hooglied

CLXXXVIJ Dit is der bruut antwoorde den dochtren

DIe bruut heuet wel verstaen
Hoe minnentlike hebben ontfaen
Hare dochtren mit gansen sinne
Van haren lieue ganse minne
Want si mit herten des begaren
Dat si in sinen houe varen
Dair si hem in mogen ruken
Ende altoes soetelike ghebruken
¶ Der bruut antwoirt der soeter scaren
Vanden dochtren die gairne waren
Indes brudegoms minne
Ende spreect dus mit soeten zinne
¶ Miin lief is gheclommen neder
In sinen hof dat hi te reder
Ga in sinen houekijn
Dair hi in gheuoet mach sijn
descendit dilectus meus
in ortum suum ad areolam
aromatis ut pascatur in
ortis et lilia colligat xcvij
¶ Ende dat hi lelien mach versamen
Nu hoort na deser glose ramen
Der bruut lief is neder comen
Vanden hemel tonsen vromen
Die inder ioodscap langhe verhuut
Was uoir dese kerstene bruut
Des spreect si in sinen houe
Dats in mi want ic mit loue
Altoes hem gairne bin bereit
Mit minnen als hi selue weit

[fol. W24rb]

 

Hi gaet ten soeten houekiin

 

Die uan sueticheit sijn fijn

 

Dat is telken sonderlike

 

Die uan minnen soeken sijn rike

35

Om dat hi werden mach gheuoet

 

Mit alre dogentliker spoet

 

Ende om dat hi die lelien scone

 

Vergadren mach sonder hone

 

¶ Dit sulwi aldus verstaen

40

Cristus is tons gegaen

 

Hier neder in dit crancke leuen

 

Om dat hi ons niet wil begeuen

 

Mer dat hi ons so wille verhoghen

 

Dat wi dair bouen comen mogen

45

Them dair hi ons toe trect

 

Doen wi dair hi ons toe wect

 

Des leest hi ons als lelien fijn

 

Dair wi in hem scone sijn

 

Mit wille mit woorde mit werken

50

Pleecht hi nauwe hier ons te merken

 

Om dat hi ons wille vergadren

 

Ende brenghen ons te sinen vadre