Commentaar op het Hooglied

[fol. W19va]

LXXXVIIJ Die glose

Wat dese celle is uanden wiin
Dat moet ic nv hier laten siin
Want hier uoren is bescreuen
Dat inden kelre is bedreuen
Doe die bruut in was gheleit
Vanden coninc alst is gheseit
Mer uan deser wiin cellen
Sal die glose nv hier tellen
Doe die heilighe kerstenheit
Die die bruut gods heit
Eerst vercoren was in gode
Inden apostolen die sine ghebode
Noch niet uolcomelike ontfaen
En hadden: want si sonder waen
Waren in anxte in menigen noden
Vanden ioden diese doden
Des si dicken waren in sorgen
Want si hem huden ende verborghen
Des sende hem god den heiligen geest
Dair si of cregen sulc uolleest
Dat si mit allen tongen spraken
Ende si worden in gods saken
So ghestarket ende uolmaect
Ende inder wairheit so gheraect
Dat si coonlike ouer al
Makede uan gheloue ghescal
Entie eerst waren veruairt
Waren lioen ende wel ghehart
Bider predikinghe ons heren
Si gingen prediken ende leren
Die ioden seiden openbaren
Dat si alle dronken waren
Doe quamen die lieue gods gesellen
Vroilijc vte wiinkelres cellen
Des heiligen gheest dair se in
Cristus leedde in dat beghin
Dese wijn is rechte lere
Ende vlijt uan gode onsen here
Si waren dronken: mer niet van wine

[fol. W19vb]

40

Als sinte pieter doet in scine

 

Hi sprac dese en siin niet dronken

 

Van dranke na al uwen donken

 

Mer dits dattie prophete iohel

 

Heuet te uoren gheseit wel

45

Het sal inden lesten daghen

 

Siin dat ic na miin behaghen

 

Van minen gheeste storten sal

 

Inder werelt ouer al

 

V kinder sullen propheteren

50

Ende uwe dochtren sullen leren

 

Doe wart die kerstenheit gheleit

 

In die wiin celle alst is gheseit