De C.L. psalmen des conincklijcken propheten Davids


Van den Iongsten Dach.
Op de Voys: Alst begint. WAeckt op ghy Christen Alle, Waeckt op met gantschen vlijt, In desen Jammer Daele,
[Folio CCLvij.v]
Waeckt op, T'is meer dan Tijdt, Die HEER sal haeste comen, Die Dach wil Auondt haen, Die Sondaers sal hy Verdoemen, Wie mach voor hem bestaen. 2. Gheen Tijdtlijck Goet mach baten, Wijsheyt noch hooghe Moet, Ghy moet het al verlaten, Als coemt die bitter Doot, Al zijt ghy schoon van Verven, Al zijt ghy Jonck end Rijck, Nochtans moet ghy Verderven, In een so cleynen Tijdt. 3. Gods Woort is ons ghegeven, Door syn Barmherticheyt, Om daer nae recht te Leven, End maecken ons bereydt, So laet ons dat Aenvaeten, End blijven vaste daer aen, In dien wy t'selve verlaeten, So ist met ons ghedaen. 4. Och waer hy noyt gheboren, Die GOdes Woort veracht, Het is met hem verloren, Hy wandelt al in der Nacht, Vol Sonden end vol schande, End schimpt met GOdes Woort, O Wee Eewich Elende, Syn Ziel is deerlijck Vermoort.
[Folio Cclviij.r]
5. Daerom ghy Christen Alle, Die hier te saemen zijt, Laet uwen Hoochmoet vallen, End wacht wel op den Tijdt, Wilt ghy by GOde Leven, Gaet soecken d'Eewighe Goet, Hy salt u Rijckelijck geven, End helpen wt aller Noot. 6. Die Armen by u woonen, Daer wilt u Ooghen Opslaen, Sy moghen u verschoonen, Als ghy voort Ordeel staen, Gods Rijck al ist een Gaeve, Ghenaed' end gheenen Loon, Nochtans d'Oprecht Gheloove Gaet in der Liefden Thoon.