De C.L. psalmen des conincklijcken propheten Davids

Wt den XC. Psalm.

Op de Voys: Wt dieper Noodt.

ACh hoe Elen'd is onse Tijt,
Al hier op deser Aerden,
Hoe haest een Mensch daer neder leyt,
End is van gheener waerden,
Want t'is in desen Jammerdal,
All' Moeyt end Arbeyt over al,
Oock alst schijnt wel ghelucken:

2. Ach Adams Val end Missedaet,
Sulcx op ons alle Erven,
HEer GOdt geeft ghy ons goeden Raet
Anders gaen wy verderven.
Dat wy so blint end seker zijn,
Midden in Droeffnis end in Pijn,
Wie macht ghenoech beclaghen?

2. HEer Godt ghy onse Toevlucht zijt,
Dijn hulpe wilt ons seynden,
Want ghy dijn Volck verlatet niet,
Die haer tot dy gaen weynden,
Met dijnen Gheeste staet ons by,

[fol.  CCLvj.v]

 

Een Saelich Eynde gheeft ons bly,

 

Door JEsum Christum, Amen.

Antiphona.

HOe saelich is de Doot, dien, die Ontslapen in God, Want sy rusten in Christo Iesu den Heere, die de Verrijssenis ende dat Leven is. Daerom en sullen wy niet treuren noch Vertsaghen, ghelijck ander die gheen Hoping' hebben, Maer ons Troosten ende Rusten op die salighe Toecoemst Iesu Christi, Daer wy ons wederom sien ende kennen sullen in Eewighe Vreughd' ende Heerlijckheydt. Amen.