De C.L. psalmen des conincklijcken propheten Davids
(1625)–Anoniem De C.L. psalmen des conincklijcken propheten Davids–
AuteursrechtvrijOp de Voys: Van HEmel hooch daer coem ick hier. | |
[Folio CLxv.r]
| |
DAnckt Godt want hy so vriend'lijc is,
Syn goetheyt Eewich duert gewis,
Danckt vrolijck Godt der Goden al,
Syn Goetheyt Eewich dueren sal.
2. Den HEEr der Heeren danck bereyt
Want Eewich duert syn goedicheyt,
Die groote Wondren doet alleyn,
Syn Goetheyt Eewich duert Certeyn.
3. Die HEmelen heeft hy ghemaeckt
Seer wijslijck, dies syn goetheyt smaeckt
Die d' Aerd opt Water wijt wt breydt,
Want Eewich duert syn Goedicheyt.
4. Die groote Lichten heeft ghedaen,
Die Son den Daghe voor te staen,
Die Maen en Sterren voor die Nacht,
Syn goetheyt Eewich duert en Macht.
5. Die d'Eerst gheboort' Egypti dood',
End leyd' Israel wter Noodt,
Door synen Arm end stercke Handt,
Syn goetheyt duert aen allen kant.
6. Die in twey deylden t'Roode Meer
Syn Goetheyt Eewelijck Regneer,
En liet daer Israel door gaen,
Want syn goetheyt blijft Eewich staen.
7. Die Pharao end al syn Heyr,
Verdronck end stier int Roode Meyr
Die syn Volck leyd' door de Woestijn,
Want Eewich duert de Goetheydt zijn.
8. Die groote Coninghen bracht om,
| |
[Folio CLxv.v]
| |
En Doodden oock All' om en tom,
Die Coninghen van Machte rijck,
Want syn Goetheyt duert Eewelijck.
9. Der Amoriter Coninck groot,
Als Sihon, hy versloech en Dood'
Te Basan Og den Coninck wreet,
Want Eewich duert syn Goedicheet.
10. Hy gaff haer Landt tot een Erffdeel
Ten Erve syn Volck Israeel,
Want syne Goedertierenheyt
Blijft altijdt end in Eewicheyt,
11. Hy Dacht aen ons, doen wy all' waer'n
Verdruckt, end hy Verlost ons gaer'n,
Van onse Vyanden so wreet,
Want Eewich duert syn Goedicheet.
12. Die allen Vleesche geeft syn Spijs
Syn goetheyt Eewich houdt den prijs,
Danckt Godes Goetheyt Vroech end' Laet,
Want Eewichlijck duert syn Ghenaedt.
13. Eer, Loff en Prijs sy hem bereydt,
Van nu aen tot in Eewicheyt,
Dat wy ghenoechsaem en bequaem,
End Eewich Eeren synen Naem.
|
|