De C.L. psalmen des conincklijcken propheten Davids

Psalm. CXIX. Beati immaculari.

Op syn eyghen Voys: Als hier nae volghet.

HEt syn doch Salich alle die,
Int recht Gheloove Wand'len hier
In GOdes Wet des HEEren,
Sy zijn oock Salich al die zijn
Tuych'nis voor Ooghen hebben fijn,
Van Herten die begeeren.
Want alle die Quaetdoenders sind,
En Wand'len niet als Godes Kind',
Noch op syn Wech Vol Trouwen

[fol.  Cxlj.v]

 

 

Ach HEEre Godt van Hemelrijck,

 

Ghy hebt gheboden vlijtelijck

 

All' dijn Ghebood' te houwen.

 

 

 

2. O GOdt dat alle t'Leven mijn

 

Ghestelt wort nae t'Behaghen dijn,

 

Dijn Rechten al te houwen.

 

Dan sal ick niet ter schanden gaen

 

Wanneer ick vlijtelijck sie aen

 

All' dijn Ghebood' vol Trouwen.

 

So danck ick dy van Herten meed'

 

Van t'Recht uwer Rechtveerdicheet

 

Twelck ghy my leert met Maten.

 

Want dijn Recht wil ick houden wel,

 

Met dijn Ghenaed' coemt tot my snel,

 

Wilt my niet heel verlaten.

 

 

 

3. Waer betert nu een Jong'ling tzaert

 

Syn Wech? Dan als hy hem bewaert

 

Nae uwe Woorden allen.

 

Ick heb met gantscher Herten vliet

 

Heer dy ghesocht, dies laet my niet

 

Van dijn Gheboden vallen.

 

Want ick heb uwe Woorden fijn

[fol.  Cxlij.r]

 

Verborghen in dat Herte mijn,

 

Op dat ick voor dy HEERE

 

Niet sondighe, Ghelooft zijt ghy

 

Door dijn Ghenaed' en goetheyt my

 

Al uwe Rechten Leere.

 

 

 

4. Nu heb ick met de Lippen mijn

 

Die Rechten al van v mont fijn

 

Vertelt, en Roemts Alomme.

 

Jae, in den Wech uws Tuychnis (Heer)

 

Met Lust te wand'len heb ick meer

 

Dan s'Werelts Rijckedomme.

 

Wat ghy beveelt spreeck ick Alleyn,

 

Want Menschen Leer en is niet reyn,

 

Ick sie op uwen Pade.

 

Nae uwen Rechten Lust my (siet)

 

Dijn Woort wil ick vergeten niet

 

Gheeft my maer dijn Ghenade.

 

 

 

5. Help Heer Godt desen dijnen Knecht

 

Dat ick mach Leven nae dijn Recht,

 

End houden dijne Woorden.

 

Doet op mijn Ooghen dat ick Claer

 

Mach sien de groote Wonder daer,

 

Dijns Wets aen allen Oorden.

 

Ick ben doch nu een Gast op Eerd,

 

En Bidt dat niet verborghen weerd

 

Voor my uwe Gheboden.

 

Mijn Siele (van t'Verlanghen groot

 

Dat ick nae dijne Rechten goet

 

Heb altijdt} wort Onvroede.

[fol.  Cxlij.v]

 

6. Den Stouten schelt ghy hier All'gaer

 

Vervloeckt syn sy oock al die daer

 

Aen dijn Gheboden feelen,

 

Keert aff van my die schand' en smae,

 

Want uwe Tuychnis coem ick nae,

 

En doese niet Verheelen.

 

Die Vorsten Raden teghen my,

 

Maer uwen Knecht die houdt hem vry

 

Aen dijne Woorden bloote,

 

So heb ick grooten Lust ter Handt

 

Aen dijn Ghetuychenissen, want

 

Sy syn mijn Raedts ghenooten.

 

 

 

7. Mijn Siele leydt int stoff der Eerd,

 

Maeckt dat ick Leeff end salich weerd,

 

Nae uwen Woorde HEEre,

 

Ick heb bekent die Weghen mijn,

 

So Antwoort end Verhoort ghy fijn,

 

Dijn Rechten ghy my Leere.

 

Den rechten Wech wijst my doch an

 

(Heer) dijns Bevels, so wil ick dan

 

Van dijne Wond'ren saghen.

 

Mijn Siel vreest van Benautheyt gaer

 

Sterckt my in dijne Woorden Claer,

 

Heer Godt verhoort mijn Claghen.

 

 

 

8. Den valschen Wech neemt ver' van my

 

Verleent my die Ghenaed' daer by

 

Nae dijne Wet te Leven.

 

Den rechten Wech heb ick Vercoor'n,

 

End heb Vergeten noch Verloor'n

[fol.  Cxliij.r]

 

Dijn Oordeelen daer neven,

 

Ick hanghe dijn Tuychnissen an,

 

End Bid' O Heer, en laet my dan

 

Doch niet te schanden werden.

 

Ick Loop den Wech dijner Ghebodt

 

Ghy hebt ghetroost O HEEre Godt

 

Mijn Hert al hier op Aerden.