De C.L. psalmen des conincklijcken propheten Davids

[fol.  Lxxvj.v]

Psalm. LXVIII. Exurgat Deus.

Op de Voys: Door Adams Val is heel verderfft, etc.

STaet op (Heer) den Vyant v'drijft,
Vlien laet all' die dy Haten,
Ghelijck als Roock die niet en blijft,
Als Vuyr doet Wasch Ontlaten,
So worden all' voor GOdt te niet,
Die Godloose met smerten,
Maer die Gherechte syn altijdt
In Godt verheucht van Herten.

2. Singt Godt, maeckt hem een goede Baen
Hy is der Weesen Vader,
Hy neemt in syn Beschermingh' aen
De Weduwen All'gader,
Hy is Godt van seer groote Cracht,
Woont in syn Heyl'ghen Throone,
Een Godt ghenaedich ende sacht,
Die steedts syn Hulp bethoone.

3. Den Eensamen hy gundt en gheeft
Het Huys vol goede Kinder,
Oock Goets ghenoech, daer by hy leeft
Met all' syn Huysghesinde.
Hy maeckt all' die Ghevanghen vry,
Die synder Hulp verwachten,
Maer den Boosen laet blijven hy,
End' in ghebreck versmachten.

4. Godt als in Ouden Tijden ghy:
Met dijnes Volckes Heyre,

[fol.  Lxxvij.r]

 

Ginckt Reysen in die Woesteny,

 

De Aerd' doen beefde seere,

 

Den HEmel droop voor desen Godt,

 

Die hem in Syna Thoonde,

 

Een Godt zijns Volckes sonder spot,

 

Die Israel verschoonde.

 

 

 

5. Maer nu (Godt) geeft ghy Regen goet,

 

Jae, Reghen vol ghenade,

 

Verquickt alsoo dijn Erve soet,

 

Dat dorr' was vroech end' spade.

 

Dies dijn Ghediert daer woonen mach

 

End' hem heel wel nu schicket,

 

Dijn Elenden ghy sonder Claegh,

 

Door dijn Goetheyt verquicket.

 

 

 

6. De HEEr heeft ons syn Woort so fijn,

 

Met veel Evangelisten,

 

End' als die Hoofden Eenich zijn,

 

Die Buyt en mach niet missen.

 

Ligt ghy te Veld' het glintzet daer,

 

Als Duyven vleughels Glansse,

 

Ghelijck Silver end' Gout te gaer,

 

Soo schijnen uwe Schansse.

 

 

 

7. Als Godt Almachtich selver gaet

 

Die Ampten wel bestieren,

 

So wort all' Licht door syn Ghenaed,

 

Daer Duysternis ginck Tieren,

 

Want Gods Bergh' is een vruchtbaer Berg'

 

Een vruchtbaer Berg vol Eere.

 

Wat roemt ghy Berg' des Werelts argh?

[fol.  Lxxvij.v]

 

Op desen Rust de HEERE.

 

 

 

8. Dees Bergh is Godes Wooningh bly,

 

Veel Duysenden syn Wagen,

 

Daer hy int Heyl'ge Synai,

 

Op vaert, end' sy hem draghen.

 

Ghy zijt HEER hooch ghevaren op,

 

End' hebt die Hell' ghevangen,

 

Voor ons verplet des Vyants Cop,

 

End' Gaven ons ontfanghen.

 

 

 

9. Veel Vyanden tot Godt ghebracht

 

End in ghenaed' aeng'nomen,

 

Door dy (die Godt niet sloeghen acht)

 

Sijn in syn Rijck ghecomen.

 

Ghelooft sy Godt de HEEr die leeft,

 

Die ons met Noot beladen,

 

Sijn hulp rijck'lijck medeylet heeft,

 

En schenckt ons veel Weldaden.

 

 

 

10. Door Godt die onse Heylandt is,

 

Wy sijn den Doot ontloopen,

 

Des Vyants Hooft breeckt hy ghewis,

 

Verslaetse all' met Hoopen.

 

Nochtans Godt oock bekeeren gaet,

 

Wt Basan end' Eylanden,

 

Maer synen Honden lecken laet

 

Het bloet van syn Vyanden.

 

 

 

11. Dijn Intocht schoon int Heylichdom

 

Aensiet men Godt mijn HEEre,

 

Die Sangers end' Speel luyden vroom

 

Die Maechden oock met Eere,

[fol.  Lxxviij.r]

 

Gaen Loven dy, End' al te saem

 

Dijn Volck van Herten reyne.

 

Wy dancken dijnen Heyl'ghen Naem,

 

Voor Israels Fonteyne.

 

 

 

12. Daer heyrschet midden onder haer

 

Dijn Beniamin die Cleyne,

 

Die Vorsten Juda oock al daer,

 

Heyrschen met haer Ghemeyne,

 

Die Vorsten Zebulon all vroet,

 

Naphthali desghelijcke.

 

Dees Evangelij Boden goet,

 

Ons Leeren Godes Rijcke.

 

 

 

13. Dijn Godt heeft dijn Rijck wel bereyt

 

Godt ons dat selffd' ooc stercke,

 

Ons' Heylandt ghy in Eewicheyt,

 

Het is dijn eyghen Wercke.

 

Om dijnes Tempels willen HEER,

 

Die Coning' sullen bringhen,

 

Haer Gaven veel tot dijner Eer,

 

End' vrolijck daer toe singhen.

 

 

 

14. Die valsche Leeraers hier en daer,

 

Wilt schelden end' Mismaecken,

 

Die Ossen die naer Gelt all gaer,

 

Met haren Calver'n haecken.

 

Verstroyt de Volcken (HEEr) geheel,

 

Die geerne quaet bedrijven,

 

Bevechten altoos dijn Erffdeel,

 

Haer Werck laet niet beclijven.

 

 

 

15. Egypten end' oock Mooren Lant,

[fol.  Lxxviij.v]

 

Tot Godt haer sullen keeren,

 

Lofsingt den HEER aen alle kant,

 

Die over al met Eeren,

 

In HEmel vaert van Aenbegin,

 

Want hy sal sterckheyt geven,

 

Sijns Donders Stem nae synen Sin,

 

End' syn Woort hooch verheven.

 

 

 

16. Geeft Godt de Macht, In Israel

 

Daer is syn Heerlickhede,

 

Sijn Macht blijckt aen de Wolcken wel,

 

In syn Heylichdom mede.

 

Godt is Israels hoochste Goet,

 

Hy sal syn Volck noch meere

 

Machtich helpen wt alle Noot,

 

Ghelooft sy Godt de HEERE.