De C.L. psalmen des conincklijcken propheten Davids

Psalm. XLV. Eructavit cor.

Op de Voys: Van Hemel quam der Enghel schaer.

MYn Hert een schoon nieu Liet begint,
Van eenen Coninck lieff'lijck singht
Dies soude wel die Tonghe mijn,
Eens rasschen Schrijvers Penne zijn.

2. De schoonst' ghy by den Menschen zijt,
Dijn Mont is vol genaed' en blijd,
Dies heeft u Godt ghesegent meed',
End' hooch begaeft in Eewicheyt.

3. Dijn Sweert dan nu omgorden gaet,
Ghy stercke Reus met groot Cieraet,
Daer 't u wel in ghelucken sal,
Mild' zijt ghy en vol Waerheyt al.

4. Groot Wonder doet dijn rechte hant,
Den Vyant brengh in smaey en schant,
Dijn Pijl verwondt ras, en met Cracht
Ghy t' Volck brengt onder uwe Macht.

[fol.  Liij.r]

 

5. Oock Eewich blijft dijn God'lick Rijck

 

End' uwen Scepter insgelijck,

 

Gherechticheyt mint ghy voorwaer

 

Het quaet en boosheyt haet ghy gaer.

 

 

 

6. Daerom heeft Christe Godt dijn heer

 

Vol vreuchden dy ghesalvet meer,

 

Godt Vader van die Volheyt zijn,

 

Dan all' dijn Metghenooten fijn.

 

 

 

7. Welruyckend' all' dijn Cleyder zijn,

 

Van Elpenbeen die Palleys dijn,

 

Des Conincx Dochters altemael,

 

Verblijden haer in dijnen Zael.

 

 

 

8. Die Bruydt tot uwer Rechten staet

 

In Costlijck Gout en Rijck ghewaet,

 

O Dochter hoort den Coninck goet,

 

Ws Vaders huys vergeten doet.

 

 

 

9. So sal de Coninck hebben daer,

 

Aen uwe schoonheyt Lust voorwaer,

 

Dies hem hooch Acht, hy is dijn Heer,

 

Valt hem te Voet, bewijst hem Eer.

 

 

 

10. Het sal op dese Hoochtijt Feest,

 

Vereeren u die Heyligh' Geest,

 

Gantsch costlick is die Coningin,

 

Wel Cuysch en Reyn vans' herten sin.

 

 

 

11. Sy wort den Coninck toe gheleydt

 

Met haer Ghespeelen schoon bereydt,

 

In s' Conincx Camer ende Zael,

 

Gaen sy met Vreuchden altemael.

[fol.  Liij.v]

 

 

 

12. Dijn Kinder sullen Princen zijn,

 

Voor die verlaten Ouders dijn,

 

Dien Coninck wil bekennen Ick,

 

Hem prijsen, Eeren Eewichlick.