De C.L. psalmen des conincklijcken propheten Davids
(1625)–Anoniem De C.L. psalmen des conincklijcken propheten Davids–
AuteursrechtvrijOp die Volghende Voys: Nu freucht juw lieven Christen. | |
[Folio xiiij.r]
| |
 HEEr wie sal woonen in dijn' Tent,
Daer ghy gaet Weldaet thoonen?
Wie sal op dijnen Berghe jent,
Godtsalich blyven woonen?
Die sonder Vlech syn Leven leydt,
Die Recht doet en die Waerheyt seyt,
Van herten sonder Foute.
2. Die gheene valsche Tongh' en heeft,
Tot s'Naesten schand' oft smade,
Niet achterclapt, noch hem begheeft
Om leedt te doen oft schade,
Die den Godloosen niet en acht,
Maer eert den Vromen, die betracht
Godts vreese vroech en spade.
3. Die synen Naesten trouw' hanteert,
Hem niet bedriecht met sweeren,
Gheen woecker van syn ghelt begheert,
| |
[Folio xiiij.v]
| |
Noch hem die Handt laet smeeren.
Wie oprecht sulcks al houden doet,
Sal blijven in des HEEren Hoedt,
End' Eewichlijck wel varen.
|
|