De C.L. psalmen des conincklijcken propheten Davids

[p. 3]

Voor-rede

Doctoris Martini Luthers.

DAT Psalmen ende Geestelijcke Liedekens te singhen, goet ende God aenghenaem zy, houde ick daer voor, is geenen Christen mensche verborghen, de wijle eenen yeghelijcken kennelijck is, niet alleene dat Exempel der Propheten ende Coningen in hun oude Testament, die met singhen, ende gheluydt der Instrumenten, met dichten ende allerleye Snaren-spel, God ghelovet ende ghedanckt hebben, maer oock in het nieuwe Testament sulck ghebruyck met Psalmen ende Geestelijcke Liedekens de al-ghemeynde Christenheydt van aenbegin ghepleecht, ende tot op onse tijdt toe onderhouden heeft, ghelijck als oock Sint Paulus sulcx 1. Corinth. 14. v. 26. ende tot den Collossensen aen het 3. cap. v.

[p. 4]

16. Item tot den Ephes. cap. 5. v. 19. Insettet ende wel hertelijcken gebiedet den Heere van herten te singhen ende te spelen met Psalmen ende Geestelijcke Liedekens, op dat daer door Gods woort ende die Christelijcke Leere op allerleye wijse ende maniere voort gedreven ende gheplant werde.

Daer nae hebbe ick oock met sommighen anderen Gheleerden Mannen, tot eenen goeden aenvangh, ende om oorsaeck te geven, dien ghenen, die het beter konden, sommighe Psalmen ende Geestelijcke Liedekens in ghedichte te samen ghebracht, dat Heylighe Euangelium, dat nu door Gods ghenade wederom op-ghegaen is, te drijven, ende in den ghebruyck te brenghen, dat wy ons oock mochten roemen, ghelijck als Moses in zijn Ghesangh doet, Exod. 15. Dat Christus onse Loff ende Gesangh sy, ende anders niet weten en souden, te singhen noch te segghen, dan alleene Ieusm Christum onsen Heylandt, ghelijck als Sint Paulus seyt, 1. Corinth. 2. v. 2. ende dien die ghecruyst is.

Ende zijn daer toe ooc veele der Psalmen ende Geestelijcke Liedekens, mede

[p. 5]

in vier stemmen ghebracht, niet uyt andere oorsaeck, dan dat ick gaerne wilde, dat die Jonghe Jeughet, die doch behoort ende moet, in de Musica, ende anderen rechten goeden Konsten, op-getoghen worden, yet wat goets ende stichtelijckx hadde, daer mede zy der onnutten ende vuylen Goelen-Liedekens ende ontuchtighen vleesschelijcken ghesangh los ende quijt worde, ende in der selven plaetse yet wat Heylsaems leerde, ende alsoo dat goede den Jonghen met lust, ghelijck als dat toe behoort, in ginghe, ende in haer hechtede ende kleefde. Oock dat ic hier mede bethoonde, ende opentlijck aen den dach gave, hoe dat ick niet van meeninghe ben, dat door dat Euangelium, souden alle goede konsten te gronde gheslaghen worden, gelijck als sommighe dwael-Geesten voor geven, maer ick woude gaerne alle die konsten, besonderlijcken Musicam sien ende hooren, in den dienst, diens ghenen, die die ghegeven ende gheschapen heeft.

Bidde dies halven eenen yegelijcken vromen Christen, hy wil hem sulckx wel behaghen laten, ende by soo verre hem Godt, sulckx ofte dies-ghelijcken,

[p. 6]

nuttelijcke Ghedichten ende Gesangen meer verleent, die danckbaerlijck aennemen ende helpen bevorderen, anders is doch de wereldt (Godt wil het beteren) al te traech ende vergetende, om de Jonghe Jeucht te leern, dat wel van nooden is, daer toe hertelijcken te vermanen, ende goede oorsaecke daer toe te geven. Godt geve ons allen zijne ghenade,

AMEN.