Het Christalyne spieghelken
(1630)–Anoniem Christalyne spieghelken, Het–
Auteursrechtvrij
[pagina 18]
| |
Op de wijse: De wereldt heeft mijn hert ghestolen. oft: Noyt meerder wonder, &c.
LAet varen, mensch, u quade wercken,
Doet op u ooghen, en wilt mercken,
Wat schade dat de ziele lijdt,
Die de doodt-sonde niet en mijdt.
Een sondaer vijandt Godts al-machtich,
Ist lijden Christi niet deelachtich,
Den heylighen Gheest van hem vliedt,
Sijn eerste deuchden gaen te niet.
Hy can het rijck Godts niet be-erven:
De rust sijns herten moet hy derven,
Die eerst van Godt wel was bemint,
Werdt door de sond’ des duyvels kint.
Seer qualijck can hy hem begheven
Tot beternisse van sijn leven,
| |
[pagina 19]
| |
Jae komt door die ghewoonte groot,
Dat hy schier sonde doet uyt noot.
O groot verlies! o groote schade!
Als men des hoochsten Godts ghenade,
Godts vrientschap en bermherticheydt,
Moet derven om een sondich feyt.
Een doot-sond comt de ziel vermoorden:
o grouwel! alleen dese woorden
Behoorden soo op’t hert te slaen,
Als oft een donder-slach quam aen.
Wat tonghe sou konnen vertellen,
Hoe groot dat is de pijn der hellen,
Daer een sondaer soo ras nae loopt,
Die sijn ziel om ghenoecht vercoopt.
Een mensch gemaect van slijck en eerde
Een stinckend’ vat van gheender weerde,
Hoe derft hy Godt, het hoochste goedt,
Vergrammen met een vryen moedt.
Och! hoe kan hy gherustich slapen,
Die den Heer, die ’t al heeft gheschapen,
Door sijne misdaet vertoornt heeft?
ach! hoe comt dat hy niet en beeft?
De Enghelen, die met ghedachten
Naer d’eere Gods maer eens en trachten,
Heeft Godt den Heere eeuwelijck
Verstooten uyt sijn hemel-rijck.
| |
[pagina 20]
| |
Adam om die verbode vruchte,
Wt ‘tParadijs, als ballinck, vluchte:
En Sodoma met ’t ander landt,
Is om de sonde gantsch verbrandt.
Wat meyndy, dat Godt u sal spaeren,
Die in u sonden langhe jaeren
Vervuylt,en dickwijls die herhaelt,
Noch noyt u schulden hebt betaelt.
Godt heeft sijn Soon om uwe sonden
Doen lijden, cruyssen, en doorwonden.
Soo dit in een groen hout gheschiedt,
Wat sal dan lijden ‘tdorre riet?
Dus wilt van sonden voorts ophouwen,
Wilt als een pest de sonden schouwen;
En betert soo u leven hier,
Dat ghy ontgaet het eeuwich vier.
|
|