Den blijden-wegh tot Bethleem voor de Christelijcke jonckheyt

vermeerdert met vele nieuwe leysenen, lof-sanghen ende gheestelijcke liedekens

Een ander,

Op de wijse: Vande Sarabande.

OCh cleynen Iesus liefste kindt,
Ghy hebt wel vremde lusten,
Dat ghy den mensch soo seer bemindt,
Dat ghy in't hoy compt rusten:
Laet ons het cleyn kindt wieghen gaen,
Want daerom ist hem toch ghedaen.

Die inde Crib nu is gheleydt,

Die can het al bestieren:
Wel Heer waer is u Mejesteyt,
Wie sal u hier verchieren:
Compt laet ons t'cleyn kindt wiegen hier,
Want het is ons verterrent vier.

Ghy sijt hier inden stal,

Tusschen die stommen beesten.
En d'Enghels singhen over al,
Met al des Hemels gheesten,
Wy wieghen t'kindt ghebenedijdt,
Dat ons van sonden heeft bevrijdt.

Wy sullen by kindt spelen gaen,

Met vriendelijck verlanghen.
En allen dinghen laeten staen
Die t'hert mocht u bevanghen,
Swijght cleynen Iesus u toch stilt
Men weet wel wat ghy hebben wilt.

[p. 51]

 

Ghy hebt ons hert gheschapen Heer,

 

Het moet by u oock wesen,

 

Al doet ons t'hoy, en stroy wat seer:

 

In pijn moet het ghenesen.

 

Sus slaept toch cleynen Iesus soet,

 

Want ghy ons hert toch hebben moet:

 

Loff sy u oock Maria schoon,

 

Wt u is Godt gheboren.

 

Daer ghy sijt daer is Hemels throon,

 

Ghy sijt ons wtvercoren:

 

Wy wieghen hier u cleyn kint teer,

 

Maer hy wieght ons noch al veel meer.