Den blijden-wegh tot Bethleem voor de Christelijcke jonckheyt

vermeerdert met vele nieuwe leysenen, lof-sanghen ende gheestelijcke liedekens

Voor H. dry Coningen dagh.

EEn kindeken is ons gheboren
In Bethlehem,
Des hadde Herodes thoren
Dat scheen aen hem.
Dry Coninghen wtvercoren
Quamen te Ierusalem,
Sy vraeghden waer hy was gheboren
Den Coninck der Ioden.
Wy saghen in Orienten die sterre sijn,
Wy comen hem aenbidden
Dat kindekijn,

Een kindeken, etc.

Doen Herodes dat vernam

Dat t'kindt gheboren was
Hy wert toornigh ende gram
Ende ontsagh hem das

[p. 19]

 

Dat hy verliesen soude

 

Sijn Rijck was groot,

 

Dacht hoe hy brenghen woude

 

Dat kindeken ter doodt.

 

Een kindeken, etc.

 

Hy vraechde met haestichede

 

Waer t'kindt gheboren was?

 

Te Bethlehem binnen de stede

 

Soo was datmen daer las,

 

Daer is gheboren die Heere groot

 

Die ons sal verlossen

 

Van d'eeuwighe doodt.

 

Een kindeken, etc.

 

Herodes sprack totten vroeden;

 

Gaet henen soeckt dat Kindt

 

Met alsoo grooten spoeden

 

Tot dat ghy hem oock vindt:

 

Boven alle Coninghen soo is hy fijn,

 

Met seyt hy sal besitten

 

Dat Rijcke mijn.

 

Een kindeken, etc.

 

Als ghy dat Kindt hebt vonden

 

Soo keert weder tot my

 

In alsoo corte stonden

 

En seght my waer dat zy

 

Ick soudt gheerne aenbeden

 

Dat kleyne Kindekijn,

 

'tHeeft seer door-sneden

 

Dat herte mijn.

 

Een kindeken, etc.

[p. 20]

 

Maer als die Coninghen quamen

 

Buyten Hierusalem,

 

Met vreughden sy vernamen

 

De sterre gaen voor hen

 

Al tot dat sy hadden vonden

 

Dat kleyne Kindekijn

 

In doecken ghewonden

 

Bij de Moeder zijn.

 

Een kindeken, etc.

 

Dry Coninghen daer aenbaden

 

Dat kindeken niet seer oudt,

 

Sy offerden wel beraden

 

Myrhe, wieroock ende Goudt

 

Dat deden sy daeromme

 

Dat daer scheen groot noot

 

Sy saghen al omme ende omme

 

Van haven bloodt.

 

Een kindeken, etc.

 

Des nachts als sy slapen wouden

 

Quam die Eghel Godts tot hen,

 

Dat sy niet keeren en souden

 

Al over Hierusalem

 

Nae eenen anderen weghe

 

Soo zijn zy ghekeert

 

Tot in hun Coninghs Rijcke

 

Alsmen ons leert.

 

Een kindeken, etc.

 

Wy bidden nu en singhen

 

Dat Iesus is bekant,

 

Dat hy ons soude bringhen

 

In sijns Vaders lant.

 

Daer hem de Enghelen eeren

 

Tot alder tijt,

[p. 21]

 

Dat gunt ons den Heer der Heeren

 

Ghebenenedijt.

 

Een kindeken, etc.