Bijdragen en Mededeelingen van het Historisch Genootschap. Deel 6

[p. 25]

Gevangenschap van J. van Lynden.¹⁾
Medegedeeld door Fr. Baron van Lynden van Hemmen.

Ik, Raeb van Bueren, doe kondt ind bekenne avermits desen quijtbrieff, also als Jasper van Lynden an mijnen handen gefenckelicke steit, dat ick denselven Jasper van der vurg. sijnre gefenckenschappen ind der hanttastinge ind gelaifften, hij mij deshalven gedaen heeft, woe sich die handell dair van allet begeven heefft, gensslick geheell ind all loss ledich ind quijt gescholden heb, ind avermyts desen quijt schelde ind en ken off en weet opte vurss. Jasper achter desen dach vorder geyne opspraicke off toe seggen der gefenckenschappen ind gelaiften halven enichsynts meer te behalen off te hebben. Sonder argelist oirk. der wairheyd, heb ick, Raeb van Bueren vurss., desen quijtbrieff myt mijnsselffs hant ind naeme onderteikent, ind omme gebreeck mijns segels gebeden Derick Poilman̄ dess selvē brieff ter meerre kondt voir ind aver mij to besegelen.

Dat ick Derick vurss. om bede. Raebs vurss. gerne gedaen ind mijn zegell beneden op spatium des briefs gedruckt heb. Geg. inden jair onss Hⁿ dusent vijff hondert ind vier, op donredach na unss lieve vrouwen dach assumptionis.

Raeb van Bueren.

(Copie.)

1) Jasper van Lynden, vijfde Baron van Hemmen, heer van Boedelham, Blitterswijk, Rozendaal enz. De omstandigheid zijner gevangenschap blijkt uit het volgende stuk.

[p. 26]

¹⁾

.... ind gheve ick.... van Lynden, u.F.G. onderdanige arme dienre ind Leenman der heerlicheits Blitterswick, u.F.G. oetmodelick ind dienstlick te kennen, woe dat ick in den jare van vieren in dienst u.F.G. bynnen Ghelre wesende, ind dat belech ter tijt van wegen u F.G. vur Wachtendonck was, durch muntlick beveel u.F.G., rijdende mit anderen u.F.G. dieneren, nedergelegen ind hart gewont byn geweest, mijn perden ind harnisch verlaeren, ind daer benevens, tot mijnen onverwynlicken ind verderfflicken schaeden, mit verkoupynge ind beswerongh mijnre armueden, mij selve heb gequeten aen handen mijnss gen. hern van Cleve, ind soe mij Rabe van Buren, Ritmeister, ter tijt tot Cranenburch gevangen ind aen handen sijn F.G. gestalt had, welicke gevenkenisse mij aver die acht hondert golden gulden gecost hieft, - Soe dan dese mijne nederlaeghe u.F.G. Land-Rentmeister Henrick die Graiff, Erffaight tot Erkelens ind beveeler tot Hattem, die ter selver tijt mit in den velde was, mit meer gueder luyden kundich rijdende na Nijmegen omb gescoth ind kruyt toe haelen, twelick vur den huyse Wachtendonck van noeden was, ind ter tijt eyn deell hessensche ruyteren oeck in u.F.G. dienst laegen, ind mit mij nedergeworpen, die doch van u.F.G. gequyt sijn worden, doch u.F.G. deden mij toe seggen mit Johan van Bronckhorst, Waltgreve, zeliger gedachten., woe ick mij ten yersten vermits troest ind bijstant mijnre frunden solde helpen

1) Van het hoofd van het oorspronkelijk stuk tot Hertog Karel van Gelre en Gulich gericht, was alleen het volgende overgebleven .... lich ind Greve.... Gron....... Covarden ind van der Drenthe mijnen genad......

[p. 27]

uyt mijne lasten, ind dit geschiet wesende, korts daerna wulden u.F.G. mij als andern u.F.G. dienern ind gevangen helpen quyten ind redden, van welicke toesaege ind vertroestinghe ick u.F.G. ter tijt hoeghlick dede dancken, nyet twivelende dan verhopende des en wurde mij alsoe geschien, ind suld aver langh tijt sulx u.F.G. t'kennen gegeven ind oitmodelyck versocht hebn̄, dan durch menichvoldich verloip krieghs ind orlochs, dat u.F.G. in middelertijt aengecomen is, heb ick mij gedult ind gerne geleden; heb noghtantz des u.F.G. hoegen wijsen Reden, mit namen Doctor Wijnant van Arnhem, zeliger gedachten., ind Lant-Rentmeister vuirss. vermaent ind duck gebeden umb dyt u.F.G. voert opt gefueghlikste toe verboetscappen: want mij dan vast voele kynderkens aengevallen zijn, ind ick gerne gelick als andern mitter eren voert wil, is hyromb mijne oetmoedige ind dienstlicke bede ind begern, dat u.F.G. mijnen guetwilligen dienst ind geleden schaeden mit gnaden aendencken ind mij helpen willen, dat ick gelick andern, u.F.G. dieneren hyrvan gequijt ind gereddet mach worden: want dit weynich u.F.G. nyet hyndert ind mij tot vollent mijnre ind mijnre kyndern helpen mach. Sulx will ick onderstaen liefs, guets ind bloets ongespaert toe verschulden omb u.F.G., ind heb mij nyewerst contrary desen bewesen, ken Got almachtich, die u.F.G. in hoegen staet regim̄t vrolick ind gesont vur all onwill bewaern moet, ind bid hyr van eyn genedich antwoert van u.F.G.

(Copie.)