Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxij. Capittel.

¶ Hoe dat de nieuwe Riuiere des leuende waters in de nieuwe Stadt van Ierusalem ghetoont wert.

1

⁺ ENde hy^* toonde my eenen louteren stroom des leuendighen waters, claer als een Crystal, die ginc vanden stoele Godts ende des Lams,

+ A vers 1

* Ezec. 47.a.1. Sac. 14.b.8.

2

Midden op haer straten. Ende op beyde zijden des strooms,^† stont houdt des leuens, dat droech twelfderley vruchten, ende bracht sine vruchten alle Maenden:

† Psalm. 1.a.3. Iere. 17.b.8.

3

Ende de bladeren des houts, dienden tot der ghesontheyt der Heydenen. Ende daer en sal niet verbannens meer zijn, ende de Stoel Gods ende des Lams sal daer in zijn,

4

Ende zijn knechten sullen hem dienen,^‡ ende zijn aensicht sien, ende zijn Naem sal aen haer voorhoofden zijn.

‡ 1.Cor. 13.b.12. 1.Ioan. 3.a.2.

5

^† Ende daer en sal gheen nacht zijn, ende en sullen gheen licht behoeuen, ofte des lichts der Sonnen. Want Godt de Heere sal haer verlichten, ende sy sullen regeren, van eewicheyt tot eewicheyt.

† Esa. 60.d.20 Apoca. 21.d.23

6

⁺ Ende hy sprack tot my: Dese woorden

+ B vers 6

[p. 108r]

zijn ghewis ende warachtich, ende Godt de Heere der heyligher Propheten, heeft zijnen Enghel ghesonden, te kennen te gheuen zijnen knechten wat cortelijck gheschien moet.

7

Siet, ick come haestelijck.^* Salich is die, die daer hout de woorden der Prophetien in desen boecke.

* Apoca. 1.a.3.

8

Ende ick ben Iohannes die sulcx ghesien ende ghehoort heeft. Ende doen ict ghehoort hadde, ende sach, viel ic neder, om aen te beden tot de voeten des Enghels, die my sulcx thoonde.

9

Ende hy spreect tot my:^† Siet toe, en doet het niet, Want ick ben dijn mede knecht, ende dijner broederen der Propheten, ende der ghener, die daer houden de woorden deses boecx.^* Bidt Godt aen.

† Acto. 10.c.26. 14.c.14. Apoc. 19.b.10

* Mat. 4.b.10.

10

⁺ Ende hy spreect tot my: En beseghelt de woorden der Prophetien niet in desen boecke, want de tijt is nae by.

+ C vers 10

11

Wie boos is, die sy allenneen boos: Ende wie onreyn is, die si allenneen onreyn.^‡ Maer wie vroom is, die worde noch vromer: Ende wie heylich is, die worde noch heyligher.

‡ Philip. 3.b.12 Hebre. 6.a.1.

12

Ende siet, ick come haestelijck, ende mijn loon met my,^* om te gheuen eenen yeghelijcken, soo zijn wercken zijn sullen.

* Esa. 62.b.13 Iere. 17.b.10.

13

^† Ick ben de A ende de O, dat aenbeghin ende dat eynde, de eerst ende de laetst.

† Esaie. 44.b.6. Apoca. 1.b.8. 21.a.6.

14

Salich zijn die zijn gheboden houden, op dat haer macht sy aen den houte des leuens, ende tot de poorten ingaen in de Stadt.

15

^‡ Want daer buyten zijn de honden, ende de Toouenaers, ende de Hoereniaghers, ende de dootslaghers, ende de Afgodsche, ende alle die daer lief hebben, ende doen de lueghen.

‡ 1.Cor. 6.b.10 Galat. 5.c.19. Ephesi. 5.a.5. Apoc. 21.b.8.

16

⁺ Ick Iesus heb gesonden mijnen Enghel, v sulcx te betuyghen, aen de ghemeynten.^* Ick ben de wortel, ende vanden gheslachte Dauid, een clare morgen sterre.

+ D vers 16

* Esaie. 11.a.1. Rom. 15.b.12. Apoca. 5.a.5.

17

Ende de gheest, ende de Bruyt spreken: Coemt. Ende wie het hoort, die spreke: Coemt:^† Ende soo wien dorstet, die come, ende wie daer wil, die neme dat water des Leuens om niet.

† Esaie. 55.a.1. Eccli. 51.d.33. Ioan. 7.d.37.

18

Maer ick betuyghe alle, die daer hooren de woorden der Prophetien in desen boecke,^‡ Ist dat yemant daer wat toe settet, soo sal God op hem toe setten de plaghen, die in desen boecke gheschreuen staen.

‡ Deut. 4.a.2. 12.d.32. Prou. 30.a.6.

19

Ende ist dat yemant daer wat af doet, van den woorden des boecx deser Prophetien, soo sal Godt afdoen zijn deel vanden boecke des leuens, ende van der heyligher Stadt, ende van dien, dat in desen boecke gescreuen staet.

20

Het spreeckt, die sulcks betuyghet, Ia, Ick come haest, Amen. Ia, Coemt Heere Iesu.

21

De genade onses Heeren Iesu Christi, sy met v allen, Amen.

¶ Eynde des Nieuwen Testaments.

¶ Ghedruct by my Nicolaes Biestkens van Diest. Int Iaer ons Heeren .M. CCCCC. LX.