Den Bibel, Inhoudende dat Oude ende Nieuwe Testament (Biestkensbijbel)

[p. 93r]

¶ De eerste Epistel S. Ioannis.

¶ Dat .I. Capittel.

¶ In dit Capittel geeft Ioannes waerachtich getuychenis van dat eewich woort, bewijst hoet vleesch gheworden is, ende dat het ghelooue in dit woort den menschen reyn maect, ende bewijst dat niemandt Godt lief en heeft, dan die de gheboden Gods volbrenghen, ende dat niemant salich en en wort, dan die belijen dat Iesus is de Sone Godts.

1

⁺ DAt daer van^‡ aenbegin was, dat wy gehoort hebben^* dat wy ghesien hebben met onsen ooghen, dat wi beschouwet hebben^† ende onse handen getast hebben, vanden woorde des leuens,

+ A vers 1

‡ Mich. 5.a.1. Ioan. 1.a.1.

* Ioan. 1.b.14 2.Pet. 1.c.16.

† Ioan. 20.d.27

2

Ende dat leuen is verschenen ende wy hebben ghesien, ende betuygen, ende vercondighen v^‡ dat leuen, dat eewich is, welcke was by den Vader, ende is ons verschenen.

‡ Ioan. 17.a.3.

3

Wat wy gesien ende ghehoort hebben, dat vercondighen wy v, op dat oock ghy met ons gemeynschap hebbet, ende onse ghemeynschap sy met den Vader, ende met zijnen Sone Iesu Christo.

4

Ende sulcx schrijuen wy v, op dat^* uwe blijschap volcomen sy.

* Ioan. 16.c.22. 17.b.13. 2.Ioan. b.12.

5

⁺ Ende dat is de vercondinghe, die wy van hem ghehoort hebben, ende v vercondighen, dat Godt een^† licht is, ende in hem en is geen duysternis.

+ B vers 5

† Ioan. 1.a.9. 8.b.12. 9.a.5. 12.f.46.

6

^‡ Ist dat wy segghen, dat wy ghemeynschap met hem hebben, ende wandelen inder duysternisse, soo lieghen wy, ende en doen de waerheyt niet.

‡ Psal. 15.a.2. Esai. 33.b.15.

7

Maer ist dat wy int licht wandelen ghelijck als hy int licht is, soo hebben wy ghemeynschap onder malcanderen^* ende dat bloet Iesu Christi zijns Soons, maeckt ons reyn van alle sonden.

* Heb. 9.b.14. 1.Pet. 1.c.19. Apocal. 1.a.5.

8

^† Ist dat wy segghen, wy en hebben gheen sonde, so verleyden wy ons seluen, ende de waerheyt en is niet in ons:

† Pro. 20.b.9. 3.Re. 8.g.46

9

^‡ Maer ist dat wy onse sonden bekennen, so is hy getrouwe ende rechtueerdich, dat hy ons de sonden vergeeft, ende reynicht ons van alder onduecht.

‡ Iob. 13.b.23. Psal. 32.a.2. Pro. 28.b.13. Eccli. 7.c.19.

10

Ist dat wy seggen, wy en hebben niet gesondicht, soo maken wy hem tot eenen luegenaer, ende zijn woort en is niet in ons.