Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ De Apostel toont hier de hoocheyt der prophetien op de ghaue der tonghen, ende hoe datmen ghebruycken sal beyde de gauen. Hoe haer de vrouwen in de Ghemeynte houden sullen.

1

⁺ STaet neerstelijck^* nae der liefden. Achteruolcht vlijtich de gheestelijcke^† ghauen, maer aldermeest dat ghy propheteren muecht.

+ A vers 1

* Collos. 3.b.14

† 1.Cor. 12.a.4.

2

Want die met der tonghen spreeckt, die en spreeckt niet met den menschen, maer Gode, want na hem en hoort niemandt.

3

Maer wie propheteert, die spreect den menschen tot beteringhe, ende tot vermaninghe, ende tot troostinghe.

4

Wie met der tongen spreeckt, die^† betert hem seluen: Maer wie propheteert, die betert de gemeynte.

† Sticht.

5

Ick woude, dat ghy alle met tonghen spreken condet, maer veel meer dat ghy propheteerdet. Want die daer propheteert, die is grooter, dan die met tonghen spreect, ten sy dan, dat hijt oock wtlegge, op dat de ghemeynte daer af ghebetert worde.

6

Maer nv, lieue Broeders, waert dat ick tot v quame, ende sprake met tongen, wat ware ick v nut? Waert dat ick niet met v en sprake dier een, door openbaringe, oft door kennisse, ofte door Prophetie, ofte door leeringhe?

7

⁺ Het gaet doch oock alsoo toe met den dinghen, die daer luyden, ende nochtans niet en leuen. Het sy een Pijpe oft een Herpe, ist dat sy gheen onderscheydelijck gheluyt van haer en gheuen, hoe canmen weten, wat daer ghepepen oft gheherpet is?

+ B vers 7

8

Ende ist dat de Basuyne een onbediedelijck gheluyt gheuet, wie wil hem tot den strijt bereyden?

9

Also oock ghy, wanneer ghy met tonghen spreeckt, ist dat ghy gheen bediedelijcke Reden van v en geuet, hoe canmen weten, wat daer gesproken is? Want ghy sult inden wint spreecken.

10

Tis waer, daer is menigerley aert der stemmen in der Wereldt, ende gheen van den seluen en is doch onbediedelijck.

11

Ist dat ick nv niet en weet der stemmen bediedinghe, soo sal ick onduytsch zijn den ghenen, die daer spreect. Ende die daer spreect, sal my onduytsch zijn.

12

Alsoo oock ghy, nadenmael ghy neerstelijck achteruolghet de gheestelijcke gauen, soo staet daer na, dat ghy de ghemeynte betert, op dat ghy alle dinck rijckelijck hebbet.

13

Daer om, wie met der tonghen spreeckt, die bidde also^† dat hijt oock wtlegghe.

† 1.Cor. 12.a.10

14

Ist dat ick met der tonghen bidde, so bidt mijnen gheest, maer mijnen sin en brengt niemant vrucht.

15

Maer hoe salt dan toegaen? Namelijc alsoo: Ick wil bidden met den gheest, ende wil oock bidden in den sin. Ick wil Psalmen singhen inden gheest, ende wil oock Psalmen singhen met den sin.

16

⁺ Maer als ghy seghent inden gheest, hoe sal die ghene, die in de stede des leecken staet, Amen segghen, op uwe dancksegginghe, nadenmael hy niet en weet, wat ghy segt?

+ C vers 16

17

Ghy segt wel fijn danc, maer de ander en wort daer niet af ghebetert.

18

Ick danck mijnen Gode, dat ick meer met der tonghen spreke, dan ghy alle.

19

Maer ick wil in der ghemeynte, lieuer vijf woorden spreken, met mijnen sin, op dat ick oock de andere onderwijse, dan anders thien duysent woorden met der tongen.

20

Lieue Broeders,^‡ en wordet geen kinderen int verstant, maer inder boosheyt zijt kinderen. Maer inden verstande zijt volcomen.

‡ Matt. 18.a.3. 19.b.14. Eph. 4.b.14.

21

Inde Wet staet gheschreuen:^* Ick wil met anderen tonghen, ende met anderen lippen spreecken, tot desen volcke, ende si en sullen my oock alsoo niet hooren, spreect de Heere.

* Esai. 28.b.11.

22

^† Daerom zijn de tongen tot een Teecken, niet den gheloouighen, maer den ongheloouighen: Maer de Prophetie, niet den ongheloouighen, maer den gheloouighen.

† Actor. 2.a.6.

23

Waert dat nv de gantsche ghemeynte te samen quaem aen een plaetse,⁺ ende spraken alle met tonghen, ende daer quamen in Leecken oft ongheloouighen, en souden sy niet seggen, ghy waert dul?

+ D vers 23

24

Maer waert dat ghy alle propheteer-

[p. 73r]

den, ende daer quame dan een ongeloouighe oft Leeck binnen, die werde van den seluen alle ghestraft, ende van allen gheordeelt,

25

Ende also werde dat verborghen zijns herten openbaer, ende hy soude also vallen op zijn aensicht, Godt aenbidden, ende bekennen, dat Godt waerachtich in v sy.

26

Hoe salt dan nv toegaen lieue Broeders? Wanneer ghy te samen coemt, soo heeft een yeghelijck eenen Psalm, hy heeft een Leere, hy heeft tonghen, hy heeft openbaringe, hy heeft wtlegginghe: Latet altemael gheschien tot beteringhe.

27

Ist dat yemant met der tonghen spreeckt, oft twee, oft opt meeste drie, deen na den anderen, so legget een wt.

28

Maer en is hy gheen wtleggher, so swijghe hy inde ghemeynte, maer spreecke hemseluen ende Gode.

29

Maer de Propheteerders laet spreken twee oft drie,^* ende latet de anderen ordeelen.

* 1.Ioan. 4.a.1

30

Ende ist datter een openbaringe gheschiet, eenen anderen, die daer sidt, so swijghe de eerste.

31

⁺ Ghy connet wel alle propheteren, de een nae den anderen, op dat sy alle leeren, ende alle vermaent worden.

+ E vers 31

32

Ende de geesten der Propheten, zijn den Propheten onderdaen.

33

Want Godt en is gheen Godt des ongeordineertheyts, maer des^† vredes, als in alle ghemeynten der Heylighen.

† Rom. 15.b.33.

34

^‡ Vwe Wijuen laet swijghen inder ghemeynte, want het en sal niet toegelaten worden, dat sy spreken, maer onderdanich zijn,^* ghelijck oock de Wet seyt.

‡ Luce. 2.f.38. 1.Cor. 11.a.2. 1.Tim. 2.b.12.

* Gen. 3.c.16. Ephes. 5.e.22. Coloss. 3.b.18 Titum. 2.a.5. 1.Petri. 3.a.2.

35

Maer willen sy wat leeren, so laet sy thuys haer Mannen vragen. Het staet den Wijuen qualijc, inder gemeynte te spreken.

36

Oft is dat woort Gods van v wtghecomen? Oft ist alleen tot v ghecomen?

37

Ist dat hem yemant laet duncken, hy si een Propheet, oft gheestelijck, die bekenne, wat ick v scrijue. Want het zijn des Heeren gheboden.

38

Maer is yemant onweten, die sy onweten.

39

Daerom lieue Broeders, weest neerstich om te propheteren, ende en belet niet met tonghen te spreken.

40

^† Laetet altemael eerlijck, ende ordentlijck toegaen.

† Colloss. 2.a.5.