Den Bibel, Inhoudende dat Oude ende Nieuwe Testament (Biestkensbijbel)

[p. 1r]

Dat nieuwe Testament ons Heeren Iesu Christi.

Hebr. 8.b.8.

¶ Siet, De daghen comen, spreeckt de Heere, Dat ick ouer dat huys Israel, ende ouer dat huys Iuda, een nieu Testament maken wil, Niet na den Testamente, dat ick ghemaect hebbe met haren vaderen aen den daghe, doen ick hare handt aengreep, om haer wt te leyden wt Egypten Landt. Want sy en zijn niet ghebleuen in mijnen Testamente, Soo en heb ick haerder oock niet willen achten spreeckt de Heere.

Hebr. 10.b.16.

¶ Dat is dat Testament, dat ick haer maken wil, nae dien daghen, spreeckt de Heere: Ick wil mijn Wet in haer herte gheuen, Ende in hare sinnen wil ickse scrijuen, Ende haerder sonden ende haerder ongherechticheyt, en wil ick niet meer ghedencken, etc.