Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Van den raetslach der onreynder Echt aengaende, besloten wordt.

1

⁺ DOen stont Esdras op vanden^* voorhof des Tempels buyten, ende ginck henen in de slaepcamer Ionathe, des soons Nasabi,

+ A vers 1

* 1.Esd. 10.b.6

2

Ende bleef aldaer, ende en adt gheen spijse, ende en dranc ooc niet, om de menichte der misdaet des volcx.

3

Ende daer wort een vercondinghe ghedaen in geheel Iudea, ooc tot Ierusalem alle de ghene die wter geuanckenisse tot Ierusalem vergadert waren,

4

Als dat een yegelijc die niet in twee oft drie dagen nae de kennisse der ouder Raets heeren tot Ierusalem en quame, die soude zijn goet ghenomen werden, ende hy soude wtgesloten zijn vander ghemeynte der gheuanckenisse.

5

Ende alle die wt den gheslachte Iuda ende BenIamin, zijn in drie dagen tot Ierusalem vergadert geworden, inde negenste Maent op den twintichsten dach.

6

Ende de geheele gemeynte sat inden Hof des Tempels al beuende, want den winter was voorhanden.

7

Doen stont Esdras op, ende sprac: Ghy Lieden hebt onrecht gedaen, dat ghy de wtlantsche wijuen, v ten houwelijcke genomen hebt, waer mede ghy de sonde Israels ghehoopt hebt.

8

Nv so bekennet dat, ende geeft lof den HEEre God onser vaderen,

9

Ende volbrenget sinen wille, wijct vanden Heydenen des Lants, ende van de wtlantsche wijuen.

10

Doen heeft dat geheele volc met grooter stemmen geschreyt, ende gesproken: Also ghy gesproken hebt, also willen wy hem doen:

11

Maer te wijle dat des volcx veel is, ende des winters coude tegenwoordich, so en mogen wy buyten het dack niet staen: Daer toe so en is dit gheen dinck, dat in een oft in twee dagen mach voleynt werden: Want wy vele hebben in dese dingen gesondicht:

12

⁺ So ordineert dat de Voorstanders der gemeynten, ende alle die by ons woonen, ende alle die, die vreemde wijuen by haer hebben, desghelijcken de Priesters, de Rechters van alle plaetsen,

+ B vers 12

13

Dat die staen inden voornoemden tijt, tot dat si den toorn des HEEren afkeeren in desen handel.

14

Doen ontfinck Ionathas den sone Ezeli, ende Ozias ende Thecam dat officie van deser sake, ende Bozoramus ende Leuis, ende Sabatheos, hebben hen daer toe geholpen.

15

Na dien stonden alle de ghene die wter geuanckenisse ghecomen waren.

16

Ende de Priester Esdras vercoos hem de Voornaemste wt den vaderen na den benaminge: Ende in de nieuwe Mane des thienden Maents saten sy te samen om dese sake te ondersoecken.

17

Ende het wert alsoo vanden Mannen, die wtlantsche Wijuen hadden, gehandelt tot op de nieuwe Mane des eersten Maents,

18

Ende daer zijn vanden Priesters gheuonden die haer met vreemde wijuen vermenghet hadden.

[p. 163v]

19

^† Wt den sonen Iesu, des soons Iosedech ende sinen broeders, Maseas ende Eliezer, ende Ioribus ende Ioadeus,

† 1.Esd. 10.d.18

20

Die verwillichden hen hare Wijuen van hen te doen, ende eenen Ram te offeren voor haer onwetenheyt.

21

Ende wt den sonen Semmeri, Masseas ende Esses, ende Ieelech, Izarias.

22

Ende wt den sonen Fosere, Limosias, Hismaenis, ende Nathanaee, Iussio, Ieddus, ende Talsas.

23

Maer vanden Leuiten, Iosabdus ende Semeis, ende Colnis, ende Calitas, ende Facteas, ende Colnas, ende Elionas.

24

Wt den Sangers des Heylichdoms, Eliarib, Sakarus.

25

Wt den Poortiers, Sallumus, ende Tolbanes.

26

Ende wt Israel, wt den kinderen ForoOsi, ende Remias, ende Geddias, ende Melchias, Michelus, Eleazarus, ende Ieminebias, ende Bannas.

27

⁺ Ende wt den kinderen Iolaman, Thanias, ende Sacharias, ende Ietrelus, ende Ioddius, ende Erimoth, ende Elias.

+ C vers 27

28

Ende wt den sonen Sathoim, Eliadas, ende Liasumus ende Sochias, ende Larimoth, ende Sabdis, ende Thebedias.

29

Ende wt den sonen Sebes, Ioannes, ende Amanias, ende Sabdias ende Emeus.

30

Ende wt den sonen Banni, Olammus, Maluchus, Ieddeus, Iasub, Asabus ende Ierimoth.

31

Ende wt den sonen Addin, Naatus ende Moosias, ende Caleus, ende Raanas, Maasias, mathathias, Beseel, Bannus ende Manasses.

32

Ende wt den sonen Naue, Noneas, Afeas, Melchias, Sameas, Simen, BenIamin, Malchus ende Marras.

33

Ende wt den sonen Asom, Carianeus, Mathathias, Bannus, Eliphalach, Manasses, Semei.

34

Wt den sonen Aanni, Ieremias, Moadias, Abramus, Iohel, baneas, Pelias, Iona, Marimoth, Eliasib, Mathaneus, Eliasis, Orizas, Dielus, Semedius, Sambris ende Ioseph.

35

Wt den sonen Nobei, Idelus, Mathatia, Sabadus, Secheda, Sedmi, Iessei ende Baneas.

36

Alle dese hadden hen vreemde geboren huysvrouwen toe geuoecht, ende si lietense gaen met den kinderen.

37

Ende de Priesters ende Leuiten, ende die wt Israel waren woonden in Ierusalem, in dat geheel Lantscap, in de nieuwe Mane, der seuenster Maent. Ende de kinderen Israels waren in haer wooningen.

38

^* Ende alle de menichte is tsamen vergadert, op de plaetse die daer is voor der heyliger Poorten des Tempels, vanden opganc der Sonnen.

* 2.Esd. 8.a.2.

39

⁺ Ende si seyden tot Esdre den hoogen Priester ende den Leser, dat hi de Wet Mosi soude brengen, die gegeuen is vanden HEEre God Israels.

+ D vers 39

40

Doen bracht Esdras de hooghe Priester die wet der gheheelder gemeynte, wijf ende man, ende alle de Priesters om de Wet te hooren alst nieuwe Mane der seuenster Maent was.

41

Ende hy lasse op de plaetse die voor de heylige Poorte des Tempels is, vanden morgen totten auont toe, voor de Vrouwen ende Mannen. Ende si hoorden alle na de Wet.

42

Ende Esdras de Priester ende de Leser der Wet stont op eenen houten preeckstoel, welcke daer toe ghetimmert was.

43

Ende Mathatias, Samus, Ananias, Azarias, Vrias, Ezechias, ende Balsamas stonden by hem ter rechter hant.

44

Ende tot zijnder slincker handt, Faldeus, Misael, Malachias, Abuschas, Sabus Nabadias ende Sacharias.

45

⁺ Doen nam Esdras dat boeck voor de geheele gemeynte: Want hy was de voornaemste ende heerlijcste voor allen.

+ E vers 45

46

Ende als hy de Wet had wtghelesen, soo stonden si alle opgerecht. Doen loofde Esdras den HEEre den Alderhoochsten God, den Almachtighen God der heyrscharen.

47

Ende alle dat volc antwoorde, Amen,

48

Ende si hieuen de handen opwaerts, ende vielen neder opter Aerden, ende loofden den HEEre, Iesus, Baneas, Sarebias, Iaddimus, Accubus, Sabbatheus, Calithes, Azarias, Ioradus, Ananias ende Philias de Leuiten,

49

Die de Wet des HEEren leerden, si lasen des HEEren Wet in de gemeynte, ende een yegelijc stiet voort den ghenen, die de Wet verstont.

50

Doen sprac Atharathes tot Esdra den oppersten Priester ende den Leser, ende den Leuiten, die de gemeynte leerden, segghende:

51

Desen dach is den HEEre heylich, ende si weenden alle die de Wet des HEEren hoorden.

52

Doen sprack Esdras:^† Gaet henen ende eet vanden besten, ende drinct dat soete,^* ende seynt dan ooc den genen die niet en hebben:

† 1.Esd. 8.b.11.

* Ecc. 14.b.12

53

Wandt desen dach is den HEEre heylich, ende en wilt niet truerich zijn.

54

Doen gingen si alle, aten ende droncken, ende waren vrolijc, ende sonden gauen den genen die niet en hadden, dat si ooc met vruechden eten mochten:

55

Want si waren bouen maten verblijt geworden wt de Woorden diemen hen in de Wet voorghelesen hadde, ende si zijn alle tot Ierusalem vergadert geworden om Feeste te houden, na dat verbont des HEEREN des Godts Israels.