Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Hy verwijdt haer zijne weldaden ende hare ondanckbaerheyt, op dat hyse tot wederkeeren verwecke.

1

⁺ DE Vorsten Iuda zijn den ghenen ghelijck^* die de Lantpalen versetten, Daerom wil ick mijnen thoorne ouer haer wtgieten, als water.

+ A vers 1

* Deu. 19.c.14. 27.c.17.

2

Ephraim lijdt ghewelt, ende wort geplaecht, daer aen gheschiet hem recht, Want hy heeft hem ghegeuen op [menschen] ghebode.

3

Ick ben Ephraim een Motte, Ende den huyse Iuda een Made.

4

Ende doen Ephraim zijn crancheyt, ende Iuda zijne wonden voelde^* Soo tooch Ephraim henen tot Assur, ende seynde totten Coninck te Iareb. Maer hy en conde v niet helpen, noch uwe wonden heelen.

* 4.Re. 16.b.7 2.Paral. 28.c.16.

5

Want ick ben den Ephraim ghelijc eenen Leeuwe, Ende den huyse Iuda, ghelijck als eenen ionghen Leeuwe. Ick, Ick verschuerse, ende ga daer af, Ic voerse wech, ende niemant en machse beschermen.

Ick wil wederomme op mijn plaetse gaen, tot dat sy hare schult bekennen, ende mijn aensicht soecken.

6

Alst haer qualicken gaet, soo sullen sy my vroech soecken moeten [Ende seggen:] Coemt, wy willen weder totten HEEre.^† Want hy heeft ons verschuert, Hy sal ons ooc heelen. Hy heeft ons gheslaghen, Hy sal ons oock verbinden.

† Iob. 5.b.18. Deut. 32.f.39. 1.Reg. 2.b.6. Tob. 13.a.2. Sap. 16.b.13.

7

Hy maect ons leuendich na twee daghen. Hy sal ons op den derden dach op richten, dat wy voor hem leuen sullen.

8

Dan sullen wy acht daer op hebben, ende neerstich zijn om den HEERE te bekennen. Want hy sal^† voortbreken, ghelijck de schoone morghenstont, ende sal ons comen, ghelijc als eenen regen, als eenen spaden regen, die dat Lant vochtich maect.

† opgaen voortcomen.

9

⁺Hoe wil ick v so wel doen Ephraim? Hoe wil ic v soo wel doen Iuda? Want de ghenade, die ick v bewijsen wil, sal zijn, gelijck als een dauwolcke des morgens, ende als eenen dauwe, die hem des morghens vroech wtbreydet.

+ B vers 9

10

Daerom schaue ickse door de Propheten, ende doodese door mijns mondts redene, op dat dijn Recht aent licht come:

11

^* Want ick heb lust aen der liefde, ende niet aen offerande, Ende aen de kennisse Gods, ende niet aen Brantoffer.

* Iere. 7.c.20. 1.Reg. 15.c.28 Matt. 9.b.13. 12.a.7.

12

Maer sy ouertreden dat verbont^† gelijc als Adam, daer in verachten sy my.

† Gene. 3.a.6.

13

Want Gilead is een stadt vol afgoderien ende bloetschulden.

14

Ende de Priesters met haren hoope, zijn als de Roouers^* die daer loeren op de Lieden, ende verworgen op den wege die na Sichem gaet, want sy doen wat sy willen.

* Psal. 10.b.8. 37.d.32. Iere. 9.b.8. Sap. 2.c.12.

15

^† Ick sie inden huyse Israels, daer my voor grouwelt, Want daer bedrijft Ephraim Afgoderie, Soo veronreynicht hem Israel.

† Ier. 18.b.13.

16

Maer Iuda sal noch eenen Oogst voor hem hebben, wanneer ick mijns volcx gheuanckenisse weynden sal.