Den Bibel, Inhoudende dat Oude ende Nieuwe Testament (Biestkensbijbel)

[p. 70v]

¶ De Propheet Daniel.

¶ Dat eerste Capittel.

¶ Hoe NebucadNezar de Babyloonische Coninck Ierusalem wan, ende sommighe Ionghelinghen zijn inder leeringhen opgheuoet, Ende hoe Godt zijn Licht ende wijsheyt door de selue ooc onder de Heydenen laet blincken.

1

⁺INden derden iare des rijcx Ioiakim des Conincx Iuda, quam NebucadNezar de Babiloonische Coninck voor Ierusalem, ende belegherdese.

+ A vers 1

2

^† Ende de HEEre gaf hem Ioiakim den Coninck Iuda in zijn ghewelt, Ende sommighe vaten wt den huyse Godts. Die dede hi voeren in het Lant^† Sinear in zijns Godts huys, Ende leyde de vaten in zijns Godts schatkisten.

† 4.Re. 24.a.1. 2.Par. 36.c.6.

† Babel.

3

Ende de Coninck sprack tot Aspenas sinen ouersten Camerlinck: Dat hy wt de kinderen Israels,^† vanden Coninclijcken stamme, ende Heeren kinderen wtkiesen soude,

† Esaie. 39.b.7.

4

Ionghelinghen die gheen ghebreck en hadden, Maer schoone, vernuftighe, wijse, cloecke ende verstandighe, die daer^† geschict waren, te dienen in des Conincx Hof, ende te leeren Chaldeeusche schrift, ende sprake.

† Bequaem.

5

Sulcken verordineerde de Coninck watmen haer daghelijcx geuen soude van zijnder spijse, ende vanden wijn dien hy selue dranck,⁺ Op dat si alsoo drie iaer lanc opgheuoet, daer nae voor den Coninck dienen souden.

+ B vers 5

6

Onder den welcken waren Daniel, Hanania, Misael, ende Asaria, van den kinderen Iuda.

7

Ende de Ouerste Camerlinc gaf haer namen, ende noemde Daniel,^† Beltsazer: Ende Hanania, Sadrach: Ende Misael, Misach: Ende Asaria, AbedNego.

† Dani. 10.a.1.

8

^* Maer Daniel nam voor hem in zijnder herten, dat hy hem met des Conincx spijse, ende metten wijn dien hy selue dranc, niet niet en woude veronreynigen. Ende badt den ouersten Camerlinck, dat hy hem niet en dorste veronreynighen.

* Gene. 43.f.32 Tobi. 1.b.11. Iudit. 12.a.1.

9

Ende Godt gaf Daniel, dat hem de ouerste Camerlinck gonstich ende genadich wert.

10

Die selue sprack tot hem: Ic ontsie mijnen Heere den Coninck, die v uwe spijse ende dranc verordineert heeft. Indien dat hy sage, dat uwe aensichten iammerlijcker waren, dan der andere Iongelinghen van uwen ouder, so bracht ghy my by den Coninck om mijn leuen.

11

⁺Doen sprack Daniel tot Melzar, den welcken de ouerste Camerlinck, Daniel, Hananiam, Misael ende Asariam beuolen hadde:

+ C vers 11

12

Besoecket doch met dijne knechten thien daghen lanck, Ende laet ons moes te eten gheuen, ende water te drincken.

13

Ende laet dan voor v onse gedaente, ende dier Ionghelingen, die van des Conincx spijse eten, besien. Ende na dien dat ghy dan sien sult, daer na maket met dijne knechten.

14

Ende hy gaf haer ghehoor daer in, Ende besochtet met haer thien daghen lanck.

15

Ende na de thien daghen waren si schoonder, ende beter by lijue, dan alle Ionghelingen, die van des Conincx spijse aten.

16

Doen dede Melzar haer gheordineerde spijse ende dranck wech, ende gaf haer toemoes.

17

Ende de Godt deser viere, ghaf hen const ende verstant, in alderley schrift ende wijsheyt.⁺ Maer hy gaf Daniel verstant in alle ghesichten ende droomen.

+ D vers 17

18

Ende als de tijt om was, dien de Coninck ghestelt hadde, dat si souden in gebracht worden, so brachtse de ouerste Camerlinck in voor NebucadNezar.

19

Ende de Coninck sprack met haer. Ende daer en wert onder allen niemant geuonden, die Daniel, Hanania, Misael ende Asaria ghelijck waren. Ende si werden des Conincx dienaers.

20

Ende de Coninck vantse in alle saken, die hy haer vraechde, thienmael cloecker ende verstandiger dan alle Sterrenkijkers ende Wijse in sinen gantschen Rijcke.

21

Ende Daniel leefde tot int eerste iaer des Conincx^* Cores.

* Cyri.