Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ Van de vreese ende verschrickinghe Moabs, ende haer ongheual.

1

⁺DIt^† is den last ouer Moab. Des nachts coemt verstrooringhe ouer Ar in Moab. Sy is wech. Des nachts coemt verstooringhe ouer Kir in Moab.

+ A vers 1

† Iere. 48.a.1 Ezec. 25.b.8. Soph. 2.b.8.

2

Sy is vergaen. Sy gaen henen op na Baith ende Dibon tot de Altaren om te weenen, ende te huylen, ouer Nebo ende Medba,

3

In Moab.^* Aller hooft is gheschoren, aller baert is af ghesneden. Op hare Straten ghaen si met sacken omgort. Op hare Daken ende straten huylen si alle, ende gaen weenende af,

* Iere. 48.e.37. Act. 18.b.18.

4

Hezbon ende Eleale screyen, datmen tot Iazha hoort. Daeromme kermen de gewapende in Moab, Want het gaet haerder sielen qualijcken.

5

Mijn herte schreyt tot Moab, hare veltuluchtighe vlieden vander drie iarigher koe tot Soar toe, Want si gaen henen tot Luhith ende weenen, ende opten wech tot Horonaim toe, daer verheft hem een iammerlijck gheschrey.

6

Wandt de wateren te Nimrim verdroogen, dat hoy verdorret, ende dat gras verwelckt, ende daer en wast gheen groen cruyt.

7

Want dat goet dat si vergadert, ende het volc dat si gherust hebben, voertmen ouer der willighen Beke.

8

Daer gaet een gheschrey rontom in de Palen Moabs, si huylen tot Eglaim toe,

9

Ende huylen byder Fonteynen Elim: Want de wateren te Dimon zijn vol bloets. Daer toe wil ick ouer Dimon noch meer laten comen, beyde ouer de ghene die behouden zijn in Moab des Leeuwen, ende ouer de ouerghebleuene inden Lande.

10

⁺Lieue, seyndet ghy Lantsheeren Lammeren van Sela wt der woestijne totten Berge der dochteren Sion.

+ B vers 10

11

Maer gelijck als eenen Vogel daer henen vliecht, die wt den nest verdreuen wordt,

12

So sullen de dochteren Moabs zijn, als sy voor Arnon ouer trecken. Vergadert eenen raet, Hout ghericht, Maeckt v schaduwe des middaechs als eenen nacht, Verbercht de veriaechde, ende en meldet de veltuluchtighe niet.

13

Laet mijne veriaechde by v logeren. Lieue Moab, weest ghy haer bescherminghe voor den Verderuer, soo sal de drijuer een eynde hebben, de Tribuleerder ophouden, ende de Vertreder aflaten, inden Lande.

14

Maer daer sal eenen stoel bereyt worden wt genaden, dat daer een op sitte inder waerheyt, inder Hutte Dauids, ende oordeele, ende dencke nae recht, ende voordere gherechticheyt.

15

^* Maer wy hooren vanden hoochmoet Moabs, dat hy seer groot is, dat ooc haren hoochmoet stoutheyt, ende toornicheyt grooter is dan haer macht.

* Iere. 48.d.29

16

Daerom sal de eene Moabite ouer den anderen huyelen, altemael sullen si huylen. Ouer de fundamenten der Stadt KirHareseth, sullen de verlaemde suchten.

17

Want Hesbon is een woest velt gheworden, Den Wijnstock tot Sibma is verdoruen, De Heeren onder de Heydenen hebben zijn edele wijngaertrancken verslaghen, ende zijn gecomen tot Iaeser toe, ende trecken rontsom inder woestijne, Hare Wijnrijsen zijn verstroyt, ende ouer de zee gheuoert.

[p. 7r]

18

⁺Daerom weene ic om Iaeser ende om den Wijnstock te Sibma, Ende storte veel tranen, om Hesbon ende Eliale. Want daer is eenen sanck in uwen Somer ende in uwen oogste gheuallen, also dat de vruechde ende ghenoechte ophout inden Velde.

+ C vers 18

19

Ende men en iuycht, noch en roept inden wijngaert niet, Men en perst gheenen wijn wt inder wijnpersse. Ick hebbe des singhens een eynde ghemaect.

20

Daerom rommelt mijn herte ouer Moab, ghelijck als een Herpe, ende mijn Inghewant ouer KirHares.

21

Dan salt openbaer worden, hoe dat Moab moede is by de Altaren, ende hoe hy tot zijnder kercken ghegaen sy om te bidden, Ende doch niet wtghericht en hebbe.

22

Dat ist, dat de HEEre op dat mael teghen Moab ghesproken heeft.

23

Maer nv spreect de HEEre, ende seyt: In drie Iaren ghelijck als des dachlooners Iaren zijn, sal de heerlijckheyt Moabs cleynder worden, inde groote menichte, also datter een cleyn weynich ouerblijuen sal, ende niet veel.