Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Hoe God zijn volck weder in ghenaden ontfanghet, Ende hoe si dat ongheluck haerder vianden belachen sullen, Een dreyginge ouer Palestinam.

1

⁺ENde tot dier tijt als de HEEre v ruste gheuen sal, van dijnen iammer ende onruste, ende vanden herden dienst, daer ghy in gheweest zijt,

+ A vers 1

2

Dan sult ghy alsulcken spreeckwoort hebben teghen den Coninck tot Babel, ende segghen: Hoe ist metten drijuer so gantschelijck wt, ende die Schattinghe heeft een eynde?

3

De HEEre heeft de roede der godloosen ghebroken, de roede der Heerschappers, die de volcken sloech in gramschappe sonder ophouden, ende met woeden domineerde ouer de Heydenen, ende veruolchde sonder barmherticheyt.

4

Nv rustet doch de gheheele werelt, ende is stille, ende iuychet vrolijcken. De Denneboomen ende de Cederboomen opten Libanon verblijden haer ooc ouer v (ende seggen)

5

⁺De wijle dat ghy ligget soo en coemt niemant hier op, die ons afhouwe.

+ B vers 5

6

De Helle daer onder beefde voor v, doen ghy haer tegen quaemt. Sy verweckt v de dooden, alle Bocken der werelt, ende ghebiet allen Coningen der Heydenen, van haren stoelen op te staen, op dat die selue alle deen na den anderen spreken, ende tot v segghen:

7

Ghy zijt oock gheslaghen, ghelijck als wy, ende het gaet v ghelijc als ons. Dijne heerlijcheyt is onderwaerts in de Helle geuaren met dat gheclanc dijnre herpen. Motten sullen uwe bedde zijn, ende wormen uwe decsele.

8

^* Hoe bistu vanden Hemel geuallen, ghy schoone Morghensterre? Hoe sydy ter Aerden ghepletst, ghy die de Heydenen plaghede?

* Luce. 10.b.18. Apoc. 12.b.14

9

Ghy dachtet doch in dijnre herten:^* Ic wil inden Hemel climmen, ende mijnen stoel ouer de Sterren Gods verhoogen.⁺ Ick wil my stellen opten berch des verbonts, aender zijden teghent Noorden.

* Ezech. 28.a.2.

+ C vers 9

10

Ick wil ouer de hooghe wolcken varen, ende ghelijck zijn den Alderhoochsten.

11

^† Ia totter Hellen vaert ghy, ter zijden der cuylen. So wie v siet, die sal v beschouwen ende aensien (ende segghen:)

† Ezech. 31.c.15. 32.c.18.

12

Is dat de man, die de werelt dede beuen, ende de Conincrijcken verschrickte?

13

Die den Aertbodem een woestijne maeckte, ende de steden daer inne destrueerde, ende die sine gheuanghene niet los en liete?

[p. 6v]

14

Het is waer, dat alle Coninghen der Heydenen tsamen, liggen doch met eeren, een yegelijck in sinen huyse,

15

Maer ghy zijt verworpen van dijnen graue, ghelijc als een verdoruen spruyte, gelijc een cleet der verslagenen die metten sweerde doorsteken zijn, die hier onder varen totten steenhoopen der Hellen, als een vertreden lichaem.

16

Ghy en sult niet als die begrauen worden, Wandt du hebbet dijn Lant bedoruen, ende dijn volck verslagen. Want men en sal des saets der boosachtighen nemmermeer ghedencken.

17

Beschicket, datmen sine kinderen doode, om haerder vaderen misdaets wille, dat sy niet op en comen, noch dat Lant en beeruen, noch den Aertbodem vol steden en maken.

18

⁺Ende ick wil ouer haer comen, spreect de HEEre Sebaoth, ende te Babel wtroeden haer ghedachtenisse, hare ouergebleuene gheslachten ende nacomelingen, spreect de HEEre.

+ D vers 18

19

Ende wilse maken den Eghelen tot een erffenisse, ende tot een water zee, ende wilse met eenen besem der verderffenisse vegen, spreect de HEEre Sebaoth.

20

De HEEre Sebaoth heeft ghesworen ende gheseyt: Wat gheltet, het sal also gheschieden als ick dencke, ende het sal blijuen soo icket inden sinne hebbe.

21

^† Dat Assur gheslaghen sal worden in mijnen Lande, ende dat ic hem vertreden sal om mijnen berghe, op dat zijn iock van hen ghenomen worde, ende dat sinen last van haren halse come.

† Esaie. 37.f.36

22

Dat is het voornemen dwelcke hi heeft ouer alle Landen, Ende dat is die wt ghestrecte hant, ouer alle Heydenen.

23

Want de HEERE Sebaoth heuet besloten, Wie willet keeren? Ende sine hant is wtghestrect, Wie wilse wenden?