Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Vande straffinghe Babylons.

1

⁺DIt is den last ouer Babel, die Iesaia de sone Amoz sach.

+ A vers 1

2

^† Heft op een Baniere opten hooghen berch, roept haest teghen haer, Werpet de hant op, Laet intrecken door de Poorte der Vorsten.

† Iere. 50.a.2.

3

Ic hebbe mijnen gheheylichden gheboden, ende mijne Stercke gheroepen tot mijnen thoorne, die daer vrolijc zijn in mijnder heerlijcheyt.

4

^† Daer is een ghecrijsch van eender Menichte opten berghe, als van een groot volck, Een gheroepe als een gheruyssche der versaemder Conincrijcken der Heydenen.

† 4.Reg. 7.b.6 2.Mac. 5.a.2.

[p. 6r]

De HEEre Sebaoth wapent een Heyr totten strijde,

5

Die wt verren Landen comen vanden eynde des Hemels. Ia de HEEre selue metten heyre zijns thoorns om te verderuen dat gheheele Lant.

6

⁺Huylet,^* wandt des HEEren dach is nae by, Hy coemt als een verwoestinghe vanden Almachtighen.

+ B vers 6

* Iere. 30.b.7. Amos. 5.c.18. Iohel. 2.a.1.f.31. sopho. 1.c.14.

7

Daerom sullen alle handen traech, ende alder menschen herte sal veych zijn.

8

^† Verschrickinghe, angst ende smerte, sal haer ouercomen,^‡ Haer sal bange zijn ghelijck eende die daer baert. Die eene sal hem voor den anderen ontsetten, vier root sullen haer aensichten zijn.

† Sapi. 5.a.3.

‡ Luc. 21.c.23.

9

Want siet, des HEEren dach coemt grouwelijck, toornich, grimmich om dat Lant te verdestrueren, ende de sondaers daer wt te vernielen.

10

Want de Sterren aenden Hemel, ende zijn Orion en schijnen niet claer.^† De Sonne gaet duyster op, ende de Mane schijnt doncker.

† Ezec. 32.a.8. Ioel. 2.b.10. 3.c.15. mat. 24.c.29. Mar. 13.c.24. Luce. 21.c.23.

11

Ic wil den Aertbodem besoecken om zijnder boosheydts wille, ende de godloosen om haerder onduechden wille. Ende ick wil des hoochmoets der stouten een eynde maken, ende de hoouaerdie der gheweldigher vernederen,

12

Dat een man dierbaerder zijn sal dan fijn gout, ende een mensche weerder dan stucken gouts wt Ophir.

13

^+* Daerom wil ick den Henel beweghen, dat de Aerde beuen sal van haer plaetse, door de gramschap des HEEren Sebaoth, ende door den dach zijns thoorns.

+ C vers 13

* Agge. 2.b.7.

14

Ende^* si sal zijn ghelijc als een gheiaecht Rhee, ende ghelijck een cudde sonder koye, soo dat een yeghelijck tot zijnen volcke keeren, ende een yeghelijck in zijn Lant vlieden sal.

* Babel.

15

Daerom, dat soo wie hem daer laet vinden, doorsteken wordt, ende soo wie daer by is, door dat sweert vallen sal.

16

^† Oock sullen haer kinderen voor haren ooghen verworcht, haer huysen gheplondert, ende hare wijuen ghescheynt worden.

† Psal. 137.b.9.

17

Want siet, Ic wil de Meden ouer haer verwecken, die gheen siluer en soecken, noch na gheen gout en vragen,

18

Maer de Ionghelinghen met bogen doorschieten, ende de vruchten des lichaems niet ontfermen, noch de kinderen sparen.

19

⁺Alsoo sal Babel dat schoonste onder de Conincrijcken, de heerlijcke pomperije der Caldeen, om ghekeert worden, van Godt,^† ghelijc als Sodoma ende Gomorra,

+ D vers 19

† Gene. 19.e.24

20

Datmen voort aen daer niet meer en woone, noch yemandt daer en blijue inder eewicheyt. Dat oock de Arabissche daer geene Hutten maken, ende de Herderen daer gheene koyen opslaen en sullen. Maer daer sullen Sihim logeren, ende haer huysen sullen vol Ohim zijn.

21

Ende struysen sullen daer woonen, ende veltgheesten sullen daer huppelen, Ende Wlen sullen in hare Palleysen singhen, ende Draken in hare lustighe sloten. Ende haren tijt sal haest comen, ende hare dagen en sullen haer niet versuymen.

22

Want de HEEre sal hem ouer Iacob ontfermen, ende Israel noch voortaen verkiesen, ende haer in haer Lant setten.

23

Ende vreemdelinghen sullen tot haer vlieden, ende den huyse Iacobs aenhanghen. Ende de volcken sullense aennemen, ende brenghen in hare plaetse, datse dat huys Israel besitten sal, inden Lande des HEEREN, tot knechten ende maechden.

24

Ende sullen gheuanghen houden, die ghene, van welcken si gheuanghen waren, ende sullen heerscappije hebben, ouer hare drijuers.