Den Bibel, Inhoudende dat Oude ende Nieuwe Testament (Biestkensbijbel)

¶ Den .Cxlviij. Psalm.

Haleluia.

1

⁺LOeft ghy^* Hemelen den HEEre: Loeft hem inder hoochten.

+ A vers 1

* Psal. 69.e.35.

2

^† Loeft hem alle zijn Enghelen: Loeft hem alle zijn heyren.

† Psal. 103.c.20. Dan. 3.56.

3

Loeft hem Sonne ende Mane: Loeft hem alle lichtende Sterren.

4

Loeft hem ghy Hemelen ouer al:^† Ende de wateren die bouen aen den Hemel zijn.

† Dan. 3.58.

5

Die sullen louen den Naem des HEEREN, wandt hyt^† ghebiedt, so wordet gheschapen.

† Psal. 33.b.9. Gene. 1.a.1. Iudit. 16.d.17 4.Es. 16.f.56

6

Hy onderhoutse altoos ende eewelijc, hy ordineertse datse niet anders gaen en moeten.

7

Loeft den HEEre op Aerden, ghy walvisschen ende alle diepten.

8

^+* Vyer, hagel, sneeu, ende dampe, stormwinden, die zijn woort wtrichten.

+ B vers 8

* Dan. 3.66

9

Bergen ende alle cleyne bergen, vruchtbaer boomen ende alle Cederen.

10

Dieren ende alle vee, gewormte ende voghelen.

11

Ghy Coninghen op Aerden, ende alle Lieden, Vorsten, ende alle Rechteren op Aerden.

12

Ionghelinghen ende Ionckfrouwen, de oude met den ionghen.

13

Sullen louen den Naem des HEEren: Want zijne Naem alleen is hooghe: Sijnen Lof gaet soo wijt, als Hemel ende Aerde is.

14

Ende hy verhoocht den hoorne zijns volcx,^* alle zijn heylighen sullen hem louen, de kinderen Israels, dat volck dat hem dient. Haleluia.

* Psa. 145.b.10