Den Bibel, Inhoudende dat Oude ende Nieuwe Testament (Biestkensbijbel)

¶ Den .Cxviij. Psalm.

1

⁺DAnct den HEERE,^* want hy is vriendelijc, ende zijn goetheyt duert eewelijck.

+ A vers 1

* Iudit. 13.c.17. Psal. 106.a.1. 107.a.1. 136.a.1

2

Nv segghe Israel: Sijn goetheydt duert eewelijck.

3

Nv segghe dat huys Aarons: Sijn goetheyt duert eewelijck.

4

Die den HEERE vreesen, segghen nv: Sijn goetheyt duert eewelijck.

5

^* Inden ancxt riep ick den HEERE aen, ende de HEEre verhoorde my, ende troostede my.

* Psal. 18.a.7. Tren. 3.e.55. Iona. 2.a.2.

6

^† De HEEre is met my, daerom en vreese ick my niet. Wat connen my menschen doen?

† Psal. 56.b.11 Hebre. 13.a.6.

7

De HEEre is met my, om my te helpen, ende ic wil mijnen lust sien aen mijn Vianden.

8

^† Het is goet op den HEERE betrouwen: Ende hem niet verlaten op Menschen.

† Psal. 146.a.3 Iere. 17.b.7.

9

^* Het is goet op den HEEre betrouwen: Ende hem niet verlaten op Vorsten.

* Iere. 17.b.7.

10

^* Alle Heydenen omringen my,^† mer inden Naem des HEEren wil ickse in stucken houwen.

* Psalm. 3.a.7.

† Ps. 44.a.6

11

Sy omringhen my ouer al, maer inden Naem des HEEREN wil icse in stucken houwen.

12

⁺Sy omringhen my ghelijc Byen: Sy dempen ghelijc Vier in de doornen, maer inden Naem des HEEren wil ickse in stucken houwen.

+ B vers 12

13

Men stoot my, dat ick vallen sal, maer de HEEre helpt my.

14

^† De HEEre is mijn macht ende mijnen Psalm, ende is mijn Heyl.

† Exod. 15.a.2. Esaie 12.a.2.

15

Men singt met vruchden vander ouerwinninghe inde Hutten der gherechtighen: De rechter hant des HEEREN behout de ouerwinninghe.

16

De rechter hant des HEEREN is verhoocht, de rechter hant des HEEren behout de ouerwinninghe.

17

Ick en sal niet steruen, maer leuen, ende des HEEren werck vercondighen.

18

^† De HEEre castijt my wel, maer hy en gheeft my den doode niet.

† Prou. 3.b.11. Iob. 5.b.17. Hebre. 12.a.5.

19

^* Doet my de poorten der gherechticheydt open, dat ick daer in gae, ende den HEEre dancke.

* Esai. 26.a.2.

20

^† Dat is de poorte des HEEren, de gherechtighe sullen daer in gaen.

† Math. 7.b.13 Luce. 13.d.24.

21

⁺Ick dancke v, dat ghy my verootmoedicht, ende helpt my.

+ C vers 21

22

^* Den steen, dien de boulieden verwierpen, is tot eenen hoecsteen geworden.

* Mat. 21.e.42. Act. 4.a.11. 1.Pet. 2.a.7. Roma. 9.f.33.

23

Dat is vanden HEEre geschiet: Ende is een wonder voor onsen ooghen.

24

Dit is den dach, dien de HEERE maeckt: Laet ons verhueghen, ende vrolijc daer in zijn.

25

O HEEre helpt, O HEEre latet wel ghelucken.

26

^† Ghelooft sy die daer coemt inden Naem des HEEren. Wy seghenen v, ghy die vanden huyse des HEEren zijt.

† Math. 21.a.9 Marc. 11.a.10. Ioan. 12.b.13. Luce. 19.d.38.

27

De HEERE is Godt die ons verlicht, verchiert de Feeste met Meyen tot aen de hoornen des Altaers.

28

Ghy zijt mijn Godt, ende ick dancke v: Mijn Godt ick wil v prijsen.

29

Danckt^† den HEERE, want hy is vriendelijck, ende zijn goetheydt duert eewelijck.

† Psal. 106.a.1. 107.a.1. 118.a.1 136.a.1.