Den Bibel, Inhoudende dat Oude ende Nieuwe Testament (Biestkensbijbel)

¶ Den .xcv. Psalm.

1

⁺COemt herwaerts,^* laet ons den HEEre verhueghen, ende iuychen den troost onses Heyls.

+ A vers 1

* Ephe. 5.b.19.

2

Laet ons met danc voor zijn aensicht comen, ende met Psalmen hem iuychen.

3

Want de HEEre is een groot God, ende een groot Coninck ouer alle goden.

4

Want in zijnder hant is wat de aerde brengt: Ende de hoochte der berghen zijn oock sine.

5

Want zijn is de zee,^* ende hy heeftse ghemaect, ende zijn handen hebben dat drooghe bereyt.

* Gene. 1.a.9.

6

Coemt, laet ons aenbidden, ende knielen ende nederuallen voor den HEEre, die ons ghemaect heeft.

7

⁺Want hy is onse God,^† ende wy dat volck zijnder weyden, ende schapen zijnder handen.

+ B vers 7

† Psal. 79.b.13. 100.a.3.

8

^* Heden ist dat ghy zijn stemme hoort, soo en verstocket uwe herten niet,^† gelijc te Meriba gheschiede, ghelijck te Massa inder woestijne.

* Hebre. 3.a.7. 4.b.7.

† Exod. 17.a.2.

9

Daer my uwe vaderen versochten, voelden ende sagen oock mijne wercken.

10

Dat ick veertich iaer moeyte hadde met desen volcke, ende sprac: Het zijn lieden, dien haer herte altoos den onrechten wech wil, ende die mijn wegen niet leeren en willen.

11

^† Dat ick swoer in mijnen thoorne, sy en souden niet tot mijnder rusten comen.

† Num. 14.c.21 Hebre. 4.a.3.