Den Bibel, Inhoudende dat Oude ende Nieuwe Testament (Biestkensbijbel)

¶ Den .xciiij. Psalm.

1

⁺HEERE Godt,^† diens de wrake is, Godt diens de wrake is, verschijnt.

+ A vers 1

† Deut. 32.e.35. Psalm. 7.a.7. Roma. 12.c.19

2

Verheft v ghy Rechter der werelt, verghelt den hoouaerdighen wat si verdienen.

3

HEEre^† hoe langhe sullen de godloosen, hoe lange sullen de godloosen pralen?

† Psalm. 73.a.3

4

Ende soo spijtelijck spreken, ende alle quaetdoenders hen alsoo roemen?

5

HEERE si slaen dijn volck in stucken, ende plaghen dijn Erue.

6

Weduwen ende vreemdelinghen verworghen si, ende dooden de Weesen.

7

^* Ende seggen: De HEEre en sietet niet, ende de Godt Iacobs en acht dies niet.

* Psal. 73.b.11.

8

Merct doch ghy Narren onder den volcke, ende ghy dwasen wanneer wilt ghy^† cloeck worden?

† Verstandich.

9

Die het oore gheplant heeft, en soude die niet hooren? Die het ooghe ghemaect heeft, en soude die niet sien?

10

^+† Die de Heydenen castijt, en soude die niet straffen? Die de menschen leert wat si weten.

+ B vers 10

† Gene. 7.d.17. 19.e.24.

11

Maer^* de HEEre weet de gedachten der menschen, dat si ydel zijn.

* 1.Cor. 3.c.20.

12

^* Wel dien, die ghy HEEre castijt, ende leert hem door uwe wet.

* 1.Cor. 11.d.32.

13

Dat hy verduldicheyt hebbe alst qualijc gaet, tot dat den godloosen den Cuyl bereyt worde.

14

⁺Want de HEEre en sal zijn volc niet verstooten, noch zijn erue verlaten.

+ C vers 14

15

Want Recht moet doch recht blijuen, ende dien sullen alle vrome herten toeuallen.

16

Wie staet by my tegen den boosachtighen? Wie treedt tot my teghen de quaetdoenders?

17

Waert dat de HEERE my niet en holpe, so lage mijn siele scier inde stilheyt.

18

Ick sprac: Mijnen voet heeft gestruyckelt, mer dijne genade HEEre hielt my.

19

^* Ick had veel becommernissen in mijnder herten, Maer dijne troostinghe verblijde mijn siele.

* 2.Cor. 1.a.5.

20

Ghy en wordt ymmers nemmermeer eens met den schadelijcken stoele, die de Wet qualijck bediet.

21

Sy rusten haer teghen de siele des

[p. 216v]

rechtuaerdighen, ende verdoemen ontschuldich bloet.

22

Maer de HEEre is mijn beschuttinghe, mijn Godt is den troost mijns toeuerlaets.

23

Ende hi sal hen haer onrecht vergelden, ende salse om haerder boosheydts wille verdoen: De HEERE onse Godt salse verdoen.