Den Bibel, Inhoudende dat Oude ende Nieuwe Testament (Biestkensbijbel)

¶ Den .lxxvij. Psalm.

1

Eenen Psalm Assaphs voor Ieduthun voor te singhen.

2

⁺ICk^† roepe met mijnder stemmen tot Godt, tot Godt crijssche ick, ende hy verhoort my.

+ A vers 2

† Psal. 142.a.2.

3

Inder tijt mijnder noot soeck ick den HEEre, mijn hant is des nachts wtgestrect, ende en laet niet af, want mijn siele en wil haer niet troosten laten.

4

Wanneer ick bedroeft ben, so gedencke ick aen Godt: Wanneer mijn herte in ancxte is, so spreke ick. Sela.

5

Mijn ooghen hout ghy datse waken: Ick ben soo onmachtich, dat ick niet spreken en can.

6

^* Ick ghedencke des ouden tijts, der voorleden Iaren.

* Psal. 143.a.5.

7

Ick dencke des nachts aen mijn snarenspel, ende spreke met mijn herte: Mijnen gheest moet ondersoecken.

8

Sal dan de HEEre eewelijc verstooten, ende gheen ghenade meer betoonen?

9

⁺Ist dan gheheel ende al wt met zijnder goetheyt?^* Ende heeft de toesegginghe een eynde?

+ B vers 9

* Psal. 74.b.10

10

Heeft dan Godt vergheten genadich te zijn, ende zijne barmherticheyt van toornicheyt besloten? Sela.

11

Maer doch sprac ick: Ick moet dat lijden, De rechter hant des Hoochsten can alle dinck veranderen.

12

Daerom ghedencke ick aen de Daden des HEEren: Ia ick gedencke aen dijne voorleden wonder wercken.

13

Ende spreke van alle uwe wercken, ende segghe van uwen doen.

14

Godt uwen wech is heylich, waer is een soo machtighen Godt, als ghy Godt zijt.

15

^+* Ghy zijt de Godt die wonder wercken doet, ghy hebt uwe macht bewesen onder de Volcken.

+ C vers 15

* Psal. 136.a.4.

16

^* Ghy hebt dijn volck verlost gheweldichlijck, de kinderen Iacobs, ende Iosephs. Sela.

* Exod. 14.e.21

17

De wateren saghen v Godt, de wateren saghen v, ende beancxteden haer, ende de diepten raesden.

18

De dicke Wolcken goten water, de wolcken donderden, ende stralen voeren daer henen.

19

Het donderde inden Hemel, uwe blixemen lichteden op den Aertbodem, dat Aertrijc beroerde hem, ende beefde daer af.

20

Vwen wech was inde See, ende uwen padt in groote wateren, ende men spuerde doch uwen voet niet.

21

Ghy leydet v volck gelijck een Cudde schapen, door Moysen ende Aaron.