Den Bibel, Inhoudende dat Oude ende Nieuwe Testament (Biestkensbijbel)

¶ Den .lxiij. Psalm.

1

Eenen Psalm Dauids doen hy was inde woestijne Iuda.

2

⁺GOdt, ghy zijt mijn Godt,^† vroech wake ic tot dy. Mijn siele dorst na v, mijn vlees verlanghet na v, in een drooch ende dorre Lant daer gheen water en is.

+ A vers 2

† Ps. 119.h.62 143.a.6.

3

Aldaer sie ick na v in uwen deylichdom, woude gheerne aenschouwen uwe macht ende eere.

4

Want uwe goetheyt is beter dan tleuen: Mijne lippen prijsen v.

5

Aldaer woude ick v gheerne louen mijn leefdage, ende mijn handen in uwen Naem opheffen.

6

Dat ware mijns herten vruechde ende genoechte, wanneer ick v met vrolijcken monde louen soude.

7

^+* Wanneer ick my te bedde legghe, so gedencke ick aen dy: Wanneer ick op wake, so spreke ick van v.

+ B vers 7

* Deut. 6.a.7.

8

Want ghy zijt mijn hulper^† ende onder de schaduwe uwer vloghelen roeme ick.

† Psal. 17.b.8.

9

Mijn siele hanget v aen, uwe rechter hant onderhout my.

10

Maer sy staen na mijn siele om my te oueruallen: Sy sullen onder de Aerde onderwaerts varen.

11

Sy sullen int sweert vallen, ende den vossen te deel worden.

12

Maer de Coninck verhuecht hem in Godt:^† Wie by hem sweert, sal ghepresen worden: Want de lueghenmonden sullen verstopt worden.

† Deut. 6.c.13. 10.d.20.