Den Bibel, Inhoudende dat Oude ende Nieuwe Testament (Biestkensbijbel)

¶ Den .lxj. Psalm.

1

Eenen Psalm Dauids voor te singhen, op een snarenspel.

2

⁺HOort Godt mijn crijschen, ende merct op mijn ghebet.

+ A vers 2

3

Hier beneden op Aerden roep ic tot dy, wanneer mijn herte in ancxt is: Wilt my doch voeren op een hooghe steenrootse.

4

^* Want ghy zijt mijn toeuerlaet, eenen stercken toren voor mijne vianden.

* Psal. 18.b.19. 91.b.9. Eccle 34.c.16.

5

Ick wil woonen in uwe hutte eewelijcken, ende betrouwen onder v vlogelen. Sela.

6

Want ghy Godt hoort mijn gheloften, ghy beloont die wel, die uwen Naem vreesen.

7

Ghy gheeft eenen Coninck een lanck leuen, dat zijn Iaren altijts voort ende voort gedueren,

8

Dat hy altoos sit ende blijft voor Gode: Bethoont hem goedertierenheyt ende trouwicheyt, dat sy hem behoeden.

9

Soo wil ick uwen Name lofsinghen eewelijck, dat ick mijn gheloften betale daghelijcx.