Den Bibel, Inhoudende dat Oude ende Nieuwe Testament (Biestkensbijbel)

¶ Den .lx. Psalm.

1

Een gulden Cleynoot Dauids voor te singen, van een gulden Roosenspanne te leeren,

2

^* Doe hy gestreden hadde teghen de Syriers te Mesopotamia, ende tegen de Syriers van Soba, doen Ioab om keerde, ende sloech vanden Edomiten int sout dal twelf duysent.

* 2.Reg. 8. 10.

3

⁺GOdt, ghy die ons verstooten ende verstroyt hebt, ende toornich waert, troost ons weder.

+ A vers 3

4

Ghy die de Aerde beweget, ende in stucken gheschuert hebt, heylt haer ghebrokenheyt die so in stucken geuallen is.

5

Want ghy hebt dijnen volcke een hert wesen ghetoont,^† Ghy hebt ons eenen dronc wijns gegeuen, dat wy tuymelden.

† Esaie. 51.d.17 Iere. 25.e.15. Psal. 75.b.9.

6

Maer ghy hebt doch een teecken ge-gheuen, den genen die v vreesen, dwelck sy op wierpen ende haer seker maecte. Sela.

7

Op dat uwe Beminde verlost worden, so helpt nv met uwer rechter hant, ende verhoort ons.

8

^+† God spreect in zijn heylichdom, dies ben ick vrolijck, ick wil deylen Sichem, ende afmeten dat dal Suchot.

+ B vers 8

† Psal. 108.a.8.

9

Gilead is mijn, mijn is Manasse, Ephraim is de macht mijns hoofts, Iuda is mijn Vorst.

10

Moab is mijn waschvat, mijnen scoen strecke ick ouer Edom, Philistea iuychet tot my.

11

Wie wil my voeren in een vaste stat? Wie gheleydet my tot in Edom?

12

En sult ghyt niet doen Godt, ghy die ons verstoot? Ende en trect niet wt Godt op onse heyr.

13

^* Doet ons bystant inder noot, want menschen hulpe en is gheen nutte.

* Psal. 108.b.13.

14

Met Godt willen wy daden doen, hi sal onse vianden tonder treden.