Den Bibel, Inhoudende dat Oude ende Nieuwe Testament (Biestkensbijbel)

¶ Den .xxij. Psalm.

1

Eenen Psalm Dauids voor te singen vander Hinden, die vroech geiaecht wordt.

2

⁺MIin Godt,^† mijn Godt, waerom hebdy my verlaten? Ic huyle, maer mijn hulpe is verre.

+ A vers 2

† mat. 27.e.46. Mar. 15.d.34

3

Mijn Godt, des daechs roepe ick, soo en antwoort ghy niet, ende des nachts en swijghe ick oock niet.

4

^* Maer ghy zijt heylich, ghy die daer woont onder den lof Israels.

* Leuit. 19.a.2. 1.Pet. 1.c.16.

5

Onse vaders hoopten op v: Ende doen si hoopten, hielpt ghyse daer wt.

6

^* Tot v riepen si, ende werden verlost: Sy hoopten op v, ende en werden niet te schanden.

* Iudic. 3.b.9. 10.c.10.

7

Maer ick ben eenen worm, ende gheen mensche: Een spot der lieden, ende verachtinghe des volcx.

8

^* Alle die my sien, spotten mijns. Sperren den mont op, ende schudden den Cop.

* Psal. 109.d.25 Mat. 27.d.39.

9

^† Hy claghe het den HEERE, die helpe hem wt: Ende verlosse hem, heeft hy lust tot hem.

† mat. 27.e.43 Sapi. 2.c.18.

10

^+* Want ghy hebt my wt mijns moeders lichaem ghetogen: Ghy waert mijn toeuerlaet, doen ick noch aen mijns moeders borsten was.

+ B vers 10

* Psalm. 71.a.5

11

Op v ben ick gheworpen wt moeders lijf: Ghy zijt mijn Godt van mijns moeders lijf aen.

12

En zijt niet verre van mi, want den ancxt is nae by: Want hier en is gheen helper.

13

Groote Ossen hebben my omringt: Vette ossen hebben my omcinghelt.

[p. 203r]

14

^† Haer keelen sperren si op tegen my, ghelijck een briesschende ende verschuerende Leeuwe.

† Psalm. 35.c.21

15

^* Ick ben wtghegoten als water: Alle mijn beenderen hebben haer gedeylt. Mijn herte is in mijn lijf, ghelijck als ghesmolten wasch.

* Iosue. 7.a.5. 2.Reg. 14.b.14.

16

Mijn crachten zijn verdroocht ghelijc een potscherf: Ende mijn tonge cleeft aen mijnen^† raecke, ende ghy legt my in des doots stof.

† Tgehemelte des monts.

17

Want honden hebben my omuaen, ende der boosen Rotte heeft haer ouer my gemaect:^† Sy hebben mijn handen ende voeten doorgrauen.

† Mat. 27.c.35. Mar. 15.c.24

18

Ic mochte alle mijn beenen tellen: Mer si schouwen, ende sien haren lust aen my.

19

^* Sy deylen mijn cleederen onder haer: Ende worpen dat lot om mijn ghewade.

* Mat. 27.d.35. Ioan. 19.c.24 Mar. 15.c.24

20

⁺Mer ghy HEEre en weest niet verre: Mijn stercte, haest v, om my te helpen.

+ C vers 20

21

Verlost mijn siele vanden sweerde: Mijne eensame vanden honden.

22

Helpt my wt der keelen des Leeus, ende verlost my van de hoornen des^† Eenhorens.

† Iob. 39.b.12.

23

^* Ick wil uwen Naem predicken mijnen broederen: Ick wil v in de gemeynte^‡ roemen.

* Psal. 35.c.18 Ioan. 20.c.17. Hebre. 2.c.12.

‡ Louen, oft prijsen.

24

Roemt den HEERE, ghy die hem vreest: Hem eere alle saet Iacobs, ende voor hem schroeme alle saet Israels.

25

Want hy en heeft niet veracht noch versmaet de ellende des armen, ende zijn aensicht voor hem niet verborghen:^* Ende doen hy tot hem riep, hoorde hijt.

* Psal. 10.b.17. 34.a.7.

26

V wil ic prijsen in de groote gemeynte: Ick wil mijn gelofte betalen voor den ghenen die hem vreesen.

27

^+† De ellendighe sullen eten dat sy sat worden: Ende die nae den HEEre vraghen, sullen hem prijsen: Vwe herte sal eewelijck leuen.

+ D vers 27

† Psal. 132.b.15.

28

Het worden ghedachtich alder werelt eynden, dat si haer totten HEEre bekeeren: Ende voor hem aenbidden alle gheslachten der Heydenen.

29

Want de HEEre heeft een rijck, ende hy heerschet onder de Heydenen.

30

Alle vette op Aerden sullen eten, ende aenbidden:^† Voor hem sullen de knien buyghen alle die in stof ligghen, ende die becommerlijcken leuen.

† Esai. 45.c.23. Rom. 14.b.11 Phil. 2.a.10.

31

Hy sal een saet hebben dat hem dient: Vanden HEEre salmen vercondighen tot kints kinde.

32

Sy sullen comen, ende zijn gherechticheyt prediken: Den volcke dat gheboren wordt, dat hy het doet.