Den Bibel, Inhoudende dat Oude ende Nieuwe Testament (Biestkensbijbel)

¶ Den .xxj. Psalm.

1

Eenen Psalm Dauids voor te singen.

2

⁺HEEre, de Coninck verhuecht hem in uwer cracht: Ende hoe gantsch vrolijck is hy van uwer helpen?

+ A vers 2

3

Ghy geeft hem zijns herten wensch, ende en weyghert niet wat sinen mondt bidt. Sela.

4

Want ghy ouerschuddet hem met goede seegheningen:^† Ghy settet een gulden Croone op zijn hooft.

† 2.Reg. 12.f.30

5

Hy biddet v om dat leuen, soo gheeft hy hem een lanck leuen ymmermeer ende eewelijck.

6

Hy heeft groote eere aen uwe hulpe: Ghy legt lof ende chieragie op hem.

7

Want ghy set hem tot seegheninghe eewelijck: Ghy verhuecht hem met der vruechden ws aenschijns.

8

Want de Coninc hoopt op den HEEre: Ende sal door de goedertierenheyt des Hoochsten vast blijuen.

9

⁺V hant sal alle uwe vianden vinden: V rechter hant sal vinden de gene die v haten.

+ B vers 9

10

Ghy sultse maken als eenen vierigen Ouen, als ghy in de sake sien sult: De HEEre salse verslinden in sinen thoorne, dat vier salse verteren.

11

Haer vrucht suldy vernielen vanden aertbodem: Ende haer saet vander menschen kinderen.

12

Want si dachten v quaet te doen, ende maecten aenslaghen die sy niet en costen wtvoeren.

13

Want ghy sultse tot schouderen maken: Met uwe^† zenuwe suldy tegen haer aensicht micken.

† Pese.

14

HEEre, verheft v in uwe cracht: So willen wy singhen ende louen uwe macht.