Den Bibel, Inhoudende dat Oude ende Nieuwe Testament (Biestkensbijbel)

¶ Den .vij. Psalm.

1

De onschult Dauids, daer af hy den HEEre sanck, van weghen der woorden des Moren, des Ieminiten.

2

⁺OP^* v HEEre betrouwe ick, mijn Godt, helpt my^† van alle mijnen veruolghers, ende verlosset my.

+ A vers 2

* Psalm. 25.a.2 31.a.1. 71.a.1.

† 1.Re. 19.d.19 24. 26.

3

Dat si niet als Leeuwen mijn siele en grijpen, ende verschueren, dewijle daer gheen verlosser en is.

4

HEEre mijn Godt, heb ic sulcx ghedaen, ende is onrecht in mijnen handen?

5

Heb ic quaet vergouden dien, die vreetsaem met my leefden, oft die welcke my

[p. 200v]

sonder oorsake Viant waren, bescadicht.

6

So veruolge mijn Viant mijne siele, ende grijpse, ende trede mijn leuen te gronde, ende legghe mijne eere inden stof. Sela.

7

Staet op HEEre in uwer gramschap: Verheft v ouer de verbolgentheyt mijnre Vianden, ende helpt my weder in dat^† Ampt, dat ghy my beuolen hebt.

† Officie.

8

Ende dat haer de Lieden weder tot v vergaderen: Ende om der seluer wille coemt weder bouen.

9

⁺De HEEre is Richter ouer de lieden. Richtet my HEEre na mijnder gerechticheyt ende vroomicheyt.

+ B vers 9

10

Laet der Godtlooser boosheydt een eynde worden, ende vorderet de rechtuaerdighe: Want ghy rechtuaerdighe Godt,^* proeft de herten ende nieren.

* Iere. 17.b.10. 1.Reg. 16.d.7 1.Par. 29.c.9.

11

Mijnen schilt is by Gode, die den vroomen herten helpt.

12

^† Godt is een recht Richter, ende een Godt die daghelijcx dreyghet.

† Deu. 10.d.17 Psalm. 9.a.5. Iere. 11.d.20. 2.Tim. 4.e.8.

13

En wiltmen hem niet bekeeren,^* soo heeft hy zijn sweert gewettet, ende sinen boghe ghespannen, ende micket.

* Ezec. 21.b.13

14

Ende heeft daer op gheleyt dootlijck gheschut, sine pijlen heeft hy toegherust om te verderuen.

15

^† Siet, die heeft wat quaets inden sin, met onghelijck is hy beurucht, maer hy sal een faute baren.

† Iob. 15.d.35. Esaie. 59.a.4

16

^* Hy heeft eenen Cuyl ghegrauen, ende wtghebracht, ende is inden Cuyl geuallen, dien hy ghemaect heeft.

* 1.Hes. 7.c.10. Eccle. 28.a.2. Eccle. 10.a.4. Prou. 26.c.27 Susan. g.62. Dani. 6.e.24

17

^† Sijn ongheluck sal op sinen Cop comen, ende sine vermetenheydt op zijnen^* Top vallen.

† Ps. 140.b.10

* Schele.

18

Ick dancke den HEEre om zijnder gherechticheyt wille, ende wil louen den Naem des HEEREN, des Alderhoochsten.